Mamın Medvedevpen kelissózder júrgizdi

QR premer-mınıstri Asqar Mamın men RF Úkimetiniń basshysy Dmıtrıı Medvedev saýda-ekonomıkalyq jáne ınvestısııalyq yntymaqtastyq perspektıvalaryn talqylady, –  dep Qamshy.kz aqparat agenttigi habarlaıdy

Premer-Mınıstr Asqar Mamın Máskeýge sapary barysynda TMD úkimet basshylary keńesi men Eýrazııalyq úkimetaralyq keńestiń otyrystaryna qatysty, ekonomıkalyq ıntegrasııanyń ózekti máselelerin sheshý boıynsha birqatar bastamalar usyndy.

TMD elderiniń BUU-nyń shaǵyn quramdaǵy otyrysynda Qazaqstan Premer-Mınıstri saýda yntymaqtastyǵyn odan ári nyǵaıtý, «jańa ósý núktelerin» izdeý jáne Dostastyq sheńberindegi ınvestısııalyq kapıtaldy tartýdyń belsendi pozısııasyn damytý qajettiligine nazar aýdardy.

Úkimet basshysy Astana halyqaralyq qarjy ortalyǵynyń múmkindikterin qoldana otyryp, aldyńǵy qatarly tájirıbemen almasý jáne qarjylyq qyzmetterdi ózara usyný boıynsha jumysty jandandyrý úshin TMD elderiniń ınvestısııalyq strategııasyn ázirleýdi usyndy.

Premer-Mınıstr TMD sheńberindegi qyzmettermen erkin saýda týraly kelisim jobasyn kelisý boıynsha jumysty jedeldetýdiń mańyzdylyǵyn atap ótti. Sondaı-aq TMD elderiniń 2025 jylǵa deıingi óndiristik kooperasııasyn damytýdyń jańa baǵdarlamasyn ázirleý týraly bastama kóterdi.

TMD keńesi jumysynyń nátıjeleri boıynsha tar jáne keńeıtilgen quramda birqatar qujattar qabyldandy. Onyń ishinde TMD-ǵa qatysýshy memleketterdiń qoǵamnyń sandyq damýy salasyndaǵy yntymaqtastyq tujyrymdamasy jáne ony júzege asyrýdaǵy basym sharalar jospary, TMD-ǵa qatysýshy memleketterdiń aqparattyq qaýipsizdigin qamtamasyz etý strategııasy endi.