Qordaıda jańa mektepter qatary artady

Memleket basshysy Qasym-Jomart Toqaev «Syndarly qoǵamdyq dıalog-Qazaqstan turaqtylyǵy men órkendeýiniń negizi» atty Qazaqstan halqyna Joldaýynda álemdegi damyǵan otyz memlekettiń qataryna kirý mindetin jedeldetetin basym baǵyttardy aıqyndap bergeni belgili. Sonymen qatar jyldyń basty qujatyndaǵy «Áleýmettik jańǵyrýdyń jańa kezeńi» bóliminde bilim salasyna úlken seripilis berilse, mádenıet, rýhanııat salasy qyzmetkerlerine úlken qoldaýlar da mańyzdylyǵymen erekshelenip otyr. Bul turǵyda Jambyl oblysynda da nátıjeli jumystar atqarylýda. Ásirese, qazynaly Qordaı óńirindegi aýqymdy jumystar týraly aýyz toltyryp aıtýǵa bolady. Bul qatarda bilim jáne mádenıet salalarynyń damýyna aıryqsha basymdyq berilip, ońdy ister júıesin tabýda.

Máselen sońǵy jyldary aýdanda qazirgi zaman talabyna saı jańa bilim berý nysandary iske qosylyp, apatty mektepter, úsh aýysymdy oqytý júıesi joıyla bastady. Tek ótken jyldyń ózinde Kóktóbe jáne Soǵandy aýyldarynda jańa mektep ǵımaraty oqý jylynda qoldanysqa berilse, aǵymdaǵy jyly Qordaı, Qarakemer, Qaınar aýyldaryndaǵy orta mektepterge kúrdeli jóndeý jumystaryn júrgizý úshin 392 mıllıon 653 myń teńge bólindi.

Sondaı-aq birqatar aýyldyq okrýgterdiń bilim berý oshaqtaryndaǵy oryn tapshylyǵy máselesi óz sheshimin tabýda. Aǵymdaǵy jyly Qalǵuty aýylynda jańa mekteptiń qurylys jumystary bastalsa, kelesi jyly Kúnbatys-2 jáne Masanchı aýyldaryna da jańa mektepter salynyp, oqý jylynda qoldanysqa beriledi dep josparlanýda.

Búginde Elbasynyń bastamasymen «Sıfrlyq Qazaqstan» baǵdarlamasyjúzege asýda. Qordaı aýdany ákimdiginiń ishki saıasat bóliminiń bas mamany Farıza Qorabaıdyń aıtýynsha, bul baǵytta da baǵdarly bastamalar qolǵa alynyp, buqarany qýanyshqa bóleýde. Bul úrdisten bilim berý salasy da tys qalmaıdy. 2019 jyly aýdan boıynsha 9 mektepti robototehnıka kabınetterimen qamtamasyz etýge 54,6 mıllıon teńge, 2 fızıka kabınettermen qamtýǵa 14,5 mıllıon teńge bólinip, ıgerilgen. Sonymen qatar aýdan mektepteriniń oqý kabınetterine qajetti 359 dana kompıýter, proektor, ekran syndy ınteraktıvti qurylǵylarmen qamtý úshin 179,5 mıllıon teńge qaralyp, maqsatty jumsalýda. Bul bilim salasyn sıfrlandyrý maqsatynda qolǵa alynǵan jumystardyń nátıjesi.