Qysqa daıyndyq qalypty

Tarazdyq temirjolshylar qys maýsymyna saqadaı-saı. Bul týraly «Jambyl júk tasymaly» bólimshesinde fılıal dırektorynyń birinshi orynbasary Úmitbek Rysbekovtyń tóraǵalyǵymen ótken jıynda aıtyldy. Basqosýǵa sala mamandarymen qatar, oblystyq energetıka jáne turǵyn úı-kommýnaldyq sharýashylyq basqarmasynyń bas mamany R. Baıdalıev, «Baıdalıev», «Kýrbanov», «Iskakov», «Halıda» syndy jeke kásipkerlik ıeleri men «Jibek joly» sharýa qojalyǵy, «Otyn M» JShS ókilderi qatysty.

Jalpy, «Qystyń qamyn jaz oılaǵan» jambyldyq temirjolshylar qysqa daıyndyqty bastap ketkenderine de biraz bolǵan-dy. Sebebi bul qys maýsymyna daıyndyq máselesi qaralǵan alǵashqy jıyn emes. Jambyl oblystyq energetıka jáne turǵyn úı-kommýnaldyq sharýashylyq basqarmasynyń bergen málimetterine súıensek, 2019-2020 jylytý maýsymyna óńirdegi kommýnaldyq-sharýashylyq jáne bıýdjettik mekemelerge bólinýge josparlanǵan kómir kólemi 66,4 myń tonna bolsa, búgingi kúnge deıin onyń 37 myń tonnasy, ıaǵnı, 55,7 paıyzy Áýlıeata jerine jetkizilip qoıǵan.

Al jalpy Jambyl oblysy turǵyndaryna josparlanǵan 254,2 myń tonna kómirdiń 72,5 myń tonnasy daıyn.

Jıyn barysynda Úmitbek Esmurzauly, bıyl jaz mezgili óte ystyq bolǵanyn eske salyp, endi sáıkesinshe, qys maýsymynyń da qatal bolýy múmkin ekenin aıtty.

«Sınoptıkterdiń málimetinshe, kele jatqan qys mezgili ádettegiden sýyq bolady dep kútilýde. О́ıtkeni, jaz mezgilinde temperatýranyń jyldaǵydan joǵary bolǵanyn bárimiz baıqadyq. Biraq biz qys maýsymyna saqadaı-saımyz desek te bolady. Jylytý maýsymyn jyldaǵydaı qalypty ótkizemiz degen oıdamyz. Birshama ýaqyt buryn elimizdiń soltústik óńirindegi bólimshelerde vagon tapshylyǵyna baılanysty biraz keleńsizdikter oryn aldy. Bizde ondaı problema joq, vagondarǵa baılanysty másele týyndaǵan emes. Onyń barlyǵy da bizdiń jiti baqylaýymyzda.

Aıta keterligi, bıyl tarıf 10 paıyzǵa ósti. Endi ol júk tasymalynyń naqty qaı qyzmetine baılanysty ekenin, jalpy basqa da ózgeristerdi osy salanyń mamany jan-jaqty túsindirip beredi», – dedi fılıal dırektorynyń birinshi orynbasary.

Kelesi kezekte sóz alǵan jetekshi ınjener Kúlıza Omarovanyń aıtýynsha, 2018 jyldyń 1 sáýirinen beri tas kómirdiń baǵasy stavkasyna 518 teńge bolyp kelse, endi onyń quny 571 teńge bolmaq. Tasymalǵa qatysty júk vagondaryn, konteınerlerin paıdalaný, jınaýǵa baılanysty qosymsha qyzmetterdiń quny stavkasyna 10 paıyzǵa ósken.

Jıyn sońynda Úmitbek Rysbekov jınalǵandar tarapynan qoıylǵan suraqtarǵa jaýap berip, qandaı da bir másele týyndasa, der kezinde sheshýge daıyn ekendikterin aıtyp, kezekti qys maýsymyn qıyndyqsyz ótkizýge atsalysýǵa shaqyrdy.