Qutqarýshylardyń qatary qyraǵy mamandarmen tolyǵýda

Memleketimizdiń ustanǵan basym baǵyttarynyń biri – sapala kadr saıasaty ekeni belgili. Kadrdan qadir qashpas úshin Úkimet túrli memlekettik baǵdarlamalardy jandandyryp, bul baǵyttaǵy baqylaý jumystaryn jylda kúsheıtýde. Ásirese adam ómirimen tikeleı baılanysty salalarda kadrdyń bilimi men biliktiligi mańyzdy dep jazady Qamshy.kz aqparat agenttigi. Jasyratyny joq, búginde kadr tapshylyǵy barlyq salada sezilýde. Al tótenshe jaǵdaılar qyzmetiniń mamandary Kókshetaý qalasynda ǵana oqytylatynynan el habardar. Jambyl oblysynda bir jyldary birli-jarym kolledjder qutqarýshy mamandardy oqytýdy bastap edi, alaıda jemisin kórmedik. Qazir bul másele tótenshe jaǵdaılar salasynda qalaı sheshimin tabýda?

- Ázirge departamentte kadr másele boıynsha qıyndyq joq. Biz mamandar sapyn jańa kadrlarmen qalaı tolyqtyryp jatyrmyz deıtin bolsańyzdar, irikteýdi erteden bastaımyz. Iаǵnı mektepti bitirgeli jatqan túlektermen UBT synaǵyna deıin áńgimelesý júrgizemiz. Úmitkerge qoıylatyn boıy, densaýlyǵy syndy talaptardyń bárin tekserip, odan keıin ózimizden arnaıy synaqtan ótkizemiz. Jáne olardyń ata-analarynyń da kelisimin alyp, Kókshetaý tehnıkalyq ınstıtýtyna joldaımyz. Osy túlekter atalǵan oqý ornynda tegin tórt jyl oqyp, dıplomyn qolyna alǵannan keıin bizge qaıta oralady. Sol kezde men qansha maman joldaǵan bolsaq, sonsha mamanǵa departamentten oryn daıyndap otyramyn. Memleket jas mamandardy tórt jyl tegin oqytyp, shákirt aqymen qamtamasyz etkennen keıin olar bes jyl salada qyzmet etýge mindetti. Eger bas qa joldy tańdaıtyn bolsa, tórt jylǵa ketken qarjyny memleketke qaıtarýy tıis. Mine Kókshetaý tehnıkalyq ınstıtýtynda bilim alýdyń ereksheligi osynda. Osy talap pen senim údesinen shaqqan mamandar bizdiń qatarymyzǵa qosylady. Jáne olar jumysty qaıdan tabamyn dep qınalmaıdy. Joldamamen barǵan jas mamandarǵa bizde árdaıym oryn daıyn. Sondaı-aq olardyń jeke isteri qupııa kúıi saqtalady, - deıdi Jambyl oblystyq Tótenshe jaǵdaılar departamentiniń bastyǵy Baǵdat Danılov.

Qalaı alyp qarasań da qıyn da jaýapkershiligi joǵary salada bilikti mamandar jumys jasaǵany abzal. Ony departament basshysy da aıtyp otyr. Endeshe qutqarýshylarymyzdyń qatary qyraǵy qyzmetkerlermen tolyǵa bersin dep tileıik.