Tuńǵysh ret ótetin til forýmy

Ústimizdegi jylǵy 24 qazanda elordadaǵy "Qazmedıa" ortalyǵynda Shaısultan Shaıahmetov atyndaǵy "Til-Qazyna" ulttyq ǵylymı-praktıkalyq ortalyǵynyń uıymdastyrýymen "Jahandaný jáne ulttaný úderisindegi qazaq tiliniń ómirsheńdigi" atty forým ótedi.

Onda alǵash ret ZAŃ, BIZNES, BILIM, ǴYLYM, BAQ t.b. salanyń jáne "Jas Otan" jastar qanaty ókilderiniń qatysýymen latyngrafıkaly jańa álipbı negizinde qazaq tilin jańǵyrtýdyń ózekti máseleleri talqylanady.

Sharanyń maqsaty – jańa álipbı negizinde jańǵyrǵan qazaq tiliniń qazirgi zaman suranysyna saı ómirsheńdigin arttyrý joldaryn anyqtaý.

Aıtalyq, Qazaqstan Respýblıkasyndaǵy kez kelgen ZAŃ mátinin aldymen memlekettik tilde ázirleýdi uıymdastyrý, otandyq bıznesti qazaqshalandyrý, bilim berý júıesin latyn álipbıine kóshirý, ǵylymdaǵy qazaq tiliniń qoldanysyn keńeıtý, sapasyn arttyrý, BAQ-taǵy qazaqtildi kontent sapasyn arttyrý, jastar arasynda qazaq tilin brendke aınaldyrý máseleleri qozǵalady.

Forým barysynda jańa álipbı men qazaq tilin ońaı ári tıimdi jolmen úıretetin zamanaýı ınteraktıvti quraldardyń kórmesi ótedi. Munda "Til-Qazyna" ortalyǵy ázirlegen jańa IT-jobalar tanystyrylyp, kópshiliktiń qoldanylýyna usynylady. 6 seksııa boıynsha jumys jasaıtyn ǵylymı konferensııa ótkiziledi.

Nur-Sultan, Almaty, Shymkent qalalary men 14 óńirdegi tildik ahýaldy jaqsartý boıynsha úılesimdi jumysty josparlaýǵa arnalǵan óńirlik Til basqarmalarynyń basqosýy uıymdastyrylady.

Forýmda jańa álipbı emlesine qatysty jurt kókeıinde júrgen saýaldarǵa naqty jaýap beriledi dep kútilýde. Sondaı-aq memlekettik tildiń zańnamasyn jetildirý, bıznes, ǵylym, bilim, BAQ-taǵy qazaq tiliniń qoldanysyn keńeıtýge, mádenıetin arttyrýǵa qatysty naqty usynystar kórsetilgen qarar qabyldanyp, jaýapty quzyrly organdarǵa jiberiledi. Qarar «Til-Qazyna» ortalyǵynyń resmı saıtynda, BAQ-ta jarııalanady.