Bilim ordalarynyń qyzmetkerlerine qujatty durys toltyrý jaıy úıretildi

Taraz qalalyq №12 Kerimbaı atyndaǵy mektep-gımnazııasynyń májilis zalynda «Qujattama jasaý jáne qujattamany basqarý» taqyrybynda kóshpeli semınar ótkizildi. Taraz qalasy ákimdigi bilim bólimi uıymdastyrǵan mańyzdy jıynǵa Taraz qalasy ákimdiginiń bilim bólimine qarasty 37 mektep, 57 balabaqsha jáne Taraz qalasy ákimdigi mádenıet jáne tilderdi damytý bóliminiń Ortalyqtandyrylǵan kópshilik kitaphanalar júıesiniń 7 qurylymdyq bólimsheleriniń qyzmetkerleri qatysty.

Basqosý barysynda Jambyl oblysy ákimdiginiń mádenıet, arhıvter jáne qujattama basqarmasy Taraz qalasynyń memlekettik arhıviniń qyzmetkerleri semınar qatysýshylaryna vedomstvolyq arhıv jumysy jaıly dárister oqydy. Sondaı-aq, Taraz qalasy ákimdiginiń bilim bólimine qarasty mekemelerdi qujatpen qamtamasyz etý boıynsha vedomstvolarǵa ádistemelik jáne tájirıbelik turǵydan kómek kórsetti.

Semınar barysynda Ulttyq arhıv qoryn tolyqtyrý, mekemelerdiń qujattamalyq qyzmetiniń jumysyn qalyptastyrý, úılestirý bóliminiń basshysy E. Erkebulanova semınar-sabaqty ashyp, jalpy arhıv salasyna tıesili jumystar retin baıandap berdi.

Semınar-sabaq «Basqarý qujattamalyq qamtýyna qazirgi talaptar», «Qujattama jasaý jáne qujattamany basqarý tártibi» jáne «Ulttyq arhıv qory jáne arhıvter» týraly Zańdy qoldana otyryp, Ulttyq arhıv qoryn tolyqtyrý kózderi – uıymdar arhıviniń jıyntyq pasportyn rásimdeý» atalǵan bólimder boıynsha ótkizildi. Onda arhıv mamandary qujattamany basqarýdyń úlgilik qaǵıdalary, ister nomenklatýrasyn qurastyrý, qujattardy esepke alý kitabyn júrgizý, saraptaý komıssııasynyń erejesi, uıymnyń qor isi jáne uıym arhıviniń pasportyn durys toltyrý jaıyn túsindirdi.

Máselen, ister nomenklatýrasyn qurý jáne rásimdeý týraly zaman talabyna saı slaıd arqyly arhıv qyzmetkeri A. Súleımenova túsindirip berdi. Ol ister nomenklatýrasyn ázirleý barysynda qalyptasatyn isterdiń ataýlary tolyq, durys jazylýyna jáne tarmaqtarynyń durys qoıylýy, sonymen qatar mekemede arhıv týraly ereje, jospar jáne saraptaý komıssııasynyń erejesi, jospary týraly barynsha tolyq maǵlumat berip ótti.

Semınar barysynda qatysýshylar jumystaryna qatysty tolǵandyratyn saýldaryn qoıyp, jan-jaqty jaýaptar aldy.