"Eńbek" baǵdarlamasynyń sharapaty mol

Elbasy N.Nazarbaevtyń tikeleı tapsyrmasymen qabyldanǵan «Eńbek» Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan» baǵdarlamasynyń áleýmettiń áleýetin arttyrýǵa qosyp jatqan úlesi mol. Mysaly, Jambyl oblysynyń Jambyl aýdanynda atalmysh baǵdarlama aıasynda sharýasyn shalqytyp jatqan azamattardyń qatary artqan. Bul týraly Jambyl aýdandyq jumyspen qamtý ortalyǵynyń dırektory Asqar Janqorazov tarqata aıtyp berdi.

– «Eńbek» nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan» baǵdarlamasy aýdanymyzda júıeli túrde júzege asyrylýda. Máselen, shaǵyn nesıe alyp, kásibin dóńgeletemin degenderge qazirde aıryqsha qoldaý kóp. Bıylǵy jyldyń jarty jyldyǵynyń ózinde 74 adam shaǵyn nesıemen qamtamasyz etildi. Olardyń 70-i nesıege «Aýyl sharýashylyǵyn qoldaý qory» aksıonerlik qoǵamy arqyly qol jetkizse, qalǵany «Atameken – Taraz» shaǵyn nesıe uıymynan aldy, – deıdi A.Janqorazov.

Bıyl memleketten shaǵyn nesıe alyp, oǵan saýyndy sıyr satyp alǵandardyń biri– «Shadııar» jeke kásipkerlik ıesi Jubanysh Aınııazov. Ol da «Aýyl sharýashylyǵyn qoldaý qory» aksıonerlik qoǵamynyń oblystaǵy fılıaly arqyly 4 mıllıon teńńge alyp, oǵan 14 sıyr satyp alypty.

– Nesıeni 6 paıyzben 5 jylǵa aldym. 14 múıizdi iri qaranyń beseýi saýyn sıyr. Ony aýyldaǵy úıde qolda ustap otyrmyn, qalǵanyn bir sharýa qojalyqpen kelisip, aqyǵa baqtyryp jatyrmyn. Mal sharýashylyǵymen aınalysýyma aýyldastarymnyń isi arqaý boldy. Naqty aıtqanda, burynnan azyq-túlik satatyn dúkenim bar edi. Dúkenime úıinde bir-eki sıyr ustap otyrǵan kórshilerim saýyp otyrǵan sıyr sútiniń ózderinen artylǵanyn ákelip qoıyp júrdi. Al ol sútti kelgen kelgeninshe tutynýshylar talap áketetin. Osy jaıttar kóz aldymda bolyp jatqan soń, nesıege bolsa da sıyr alyp, sútin satýǵa bel býdym. Qazirgi tańda kúnine sýylǵan 25-30 lıtr súttiń ár lıtrin 130 teńgeden ótkerýdemin. Tabysymyz ózimizge jetedi. Aldaǵy ýaqytta qosymsha jumysshylardyń kómegimen mal sharýashylyǵynyń órisin keńeıtip, óz aldyna aýyl syrtynan sharýashylyq ashsam degen oıym bar, – deıdi Jubanysh Qýanyshbaıuly.

Rasynda da tynbaı tirlik etkenderdiń ǵana tabysy artady. Bul turǵyda dana halqymyz «Eńbek etseń-emersiń» dep tegin aıtpasa kerek.