Jambylda jol jóndeý jumystarynyń sapasyna basa mán berilýde

Keıingi jyldary Jambyl oblysnyń ortalyǵy-Taraz qalasy adam tanymastaı ajarlanyp keledi. Sándi saıabaqtar men kelisti kósheler shahar turǵyndary men qonaqtary úshin jaıly atmosfera qalyptastyratyndyǵy daýsyz. Osy oraıda jergilikti bılik tarapynan jylý júıeleri men kóshe joldaryn jóndeý jumystarynyń sapasyna da aıryqsha nazar aýdarylýda.

Dál qazir oblys ortalyǵynyń basty kósheleriniń biri – Abaı dańǵylynyń boıynda jol jóndeý jumystary qaıta qolǵa alynyp otyr. Qaýyrt jumystyń júrgizilip jatqanyn kórgen turǵyndardyń kókeıinde suraq kóp. Munyń mánisin túsinbeı jatqandar da bar. Osy oraıda tapsyrys berýshiler talabynyń nátıjesinde merdiger kompanııa óz mindetterin oryndaýǵa májbúr bolǵan.

Naqtylap aıtsaq, byltyr kóktemde Abaı dańǵylynyń Tóle bı men Dýlatı kósheleri arasyndaǵy 1,1 shaqyrymdyq bóliginde jylý magıstrali aýystyrylǵan. Merdigeri – «Araıstroımarket» jaýapkershiligi shekteýli seriktestigi.

– Memlekettik satyp alý týraly 2018 jylǵy 30 naýryzdaǵy №30 kelisimshartqa sáıkes «Araıstroımarket» JShS Abaı kóshesiniń boıyna 628 635 546 teńgege jylý júıelerin jóndegen. Jóndeý jumystarynyń merzimi – 2018 jylǵy 30 mamyr men 2019 jylǵy 30 qańtar aralyǵy. Bul ýchaskeniń qabyldaý aktisine sol 2018 jyldyń 1 qazanynda qol qoıylǵan. Al bıyl mamyr, maýsym aılarynda joldyń asfalt-beton qabatyn qalpyna keltirý jumystary júrgizilgen. Biraq, jol beti tómen túsip ketip, qaıta jóndeýge týra keldi. Osyǵan baılanysty oblys ákimi Asqar Isabekulynyń tikeleı qadaǵalaýymen ári kelisimsharttyń 7.2-pýnktine sáıkes merdiger kompanııa jýyrda joldy qaıta jóndeýge kiristi. Kelisimshart boıynsha kompanııa úsh jylǵa deıin qazǵan jerine qyzmet kórsetedi, – deıdi «Taraztransenergo» memlekettik kommýnaldyq kásiporny dırektorynyń mindetin atqarýshy Jaqsylyq Jógibaev.

Jaqynda bul máseleni oblys basshysy Asqar Myrzahmetov ózi tikeleı nazarǵa alyp, tıisti mekemelerge tapsyrma bergen bolatyn. О́tken senbiden beri merdiger kompanııanyń birneshe tehnıkasy Abaı dańǵylynyń boıynda jumysqa qyzý kirisip, asfalt qabatynyń 6 santımetrin qaıta arshyp alyp jatyr. Qurylysshylar endi bir aptanyń ishinde jumysty óz qarjysy esebinen aıaqtaımyz dep otyr.