Qazaqstan Jazýshylar Odaǵyna múshe bolý úshin kim bolýymyz kerek?

Meniń Odaqqa múshelik qujattaryn tapsyrǵan ýaqytym - 2012 jyl. Ol kezde N.Orazalın basqaratyn, kezdeskende amandassań, sálemińdi ıa estimeıtin, ıa shynymen de sálem bergisi kelmeıtin. Amanyńdy almaıtyn adamǵa «múshelikke alyńyzshy» dep aıtýdyń ózi artyq. О́zim «múshelikke alyńyzshy» dep eshkimge jalynǵan emespin...

Odaq basshylyǵy aýysqan soń bir top jasty qabyldaǵanyn jańalyqtardan kórdik. Tizimge qosylmappyz. Qujat qabyldaıtyn apaıǵa baryp: «Apaı, meni nege qospaǵan?» dep suradym. Odaq ǵımaratynda tóraǵa orynbasary da kezigip qaldy. Bul kisilerden «Bul joly jasy úlkenderdi ǵana aldyq, jastardy «Jastar forýmynda» qabyldaımyz, kút, seni alady» jáne «Bul joly jastardy ǵana aldyq» degen eki túrli jaýap estidim.

Sodan ózimniń ne jasqa, ne kárige jatatynymdy bilmeı, ańyryp qalǵanym ras...

Táıiri, múshelikte turǵan eshteńe joq. Almasa, qoısyn deımiz. «Meni almady» dep, eshkimge aryzdanbaımyz. 
Endi mine, búgin jańalyqtardan elimizde «Jastar forýmy» ótkenin, taǵy da bir top qalamgerlerdi múshelikke qabyldaǵanyn kórdik. Qutty bolsyn!

Aıtaıyn degenim, adamdy aldamaı, toq eter jaýabyn berý kerek qoı. Maǵan eshteńe emes, Qazaqstan jazýshylar Odaǵynyń múshesi bolmasam, birdemem kemip qalmaıdy. 2012 jyldan beri jatqan dokýmentimnen uıat boldy. Jalǵyz men emes, kóp jyl buryn qujatyn ótkizgen talaı adam múshelikti kúte-kúte umytyp ta ketken shyǵar. Men de umytaıyn... Endigi músheliktiń dámi de, máni de joq...

Qazaqtyń Jazýshylar Odaǵynyń jas basshylary!
Men Odaqqa sizderden buryn kelgenmin. Iá, sizder aýylda qozy baǵyp, qoı baǵyp júrgende men anamnyń qursaǵynda jatqanmyn. Sol kezde anam, Qazaqstandaǵy biregeı talant ıesi ǵalym, fızık Maǵrıpa Shójeǵulqyzy jazýshylardyń jıynyna úzbeı qatysatyn da, men qalamgerlerdiń aıtqan sózin túgel tyńdaıtynmyn. Muzafar Álimbaev, Syrbaı Máýlenov sııaqty aqsaqaldarmen bes jasymda, sizderden buryn kezdesip, mańdaıymnan sıpatqam.

Tek aıtarym, Jazýshylar Odaǵy eshkimniń jeke menshigi emes. Múshelikke qabyldaý qandaı krıterııler boıynsha júzege asady? Bireýlerdiń aldymen ótip, al bir baıqustardyń shegerilip qala berýine ne sebep? Osyǵan jaýap beretin adam bar ma?

Jyl saıyn múshelik jıynynda «kerek emesterdiń» tiziminde syzylyp, kete barady ekem. «Azııa forýmyna Japonııadan jazýshy shaqyryp bershi» dep jaz boıy jazǵan hattaryńyz mende saqtaýly. Qazaq qazaqqa kerek emes zaman ǵoı. Qazaqqa kerek bolmasaq ta, basqaǵa kerekpiz!

Sharafat Jylqybaeva
Hıroshımadaǵy Japonııa-Eýrazııa Odaǵynyń múshesi.