Jambyl oblysynda polısııanyń bes front-keńsesi ashyldy

Aǵymdaǵy jyldyń 19 qyrkúıeginde Polısııa departamenti basshylarynyń, ákimdik ókilderiniń, Sybaılas jemqorlyqqa qarsy is-qımyl agenttiginiń Jambyl oblysy boıynsha departamenti, úkimettik emes uıymdar, BAQ ókilderi jáne blogerlerdiń qatysýymen Jambyl oblysynyń Polısııa departamenti janyndaǵy front-keńsesiniń ashylý saltanaty ótti dep habarlaıdy Qamshy.kz aqparat agenttigi Jambyl oblysy Polısııa departamentiniń Baspasóz qyzmetine silteme jasap.

Ishki ister organdaryn jańǵyrtý jónindegi 2019-2021 jyldarǵa arnalǵan Jol kartasyn jáne Qazaqstan Respýblıkasynyń Prezıdenti Qasym-Jomart Toqaevtyń Qazaqstan halqyna Joldaýynda belgilengen maqsattardy iske asyrý aıasynda azamattar úshin bul kúni birden bes front-keńse, onyń ishinde ekeýi aýdandyq polısııa bólimderiniń janynan ashyldy.

Nátıjesinde búgingi tańda Jambyl oblysynda 14 front-keńse jumys jasaıdy. Onda ákimshilik polısııa, kóshi-qon jáne jergilikti polısııa qyzmetiniń mamandary turǵyndardyń suraqtaryna jaýap berip, túrli máselelerdi sheshýge qatysty qajetti kómek kórsetedi, sonymen qatar halyqqa kórsetiletin memlekettik qyzmetter boıynsha aqparat beredi.

Sondaı-aq front-keńse qyzmetkerleri ózderiniń tikeleı mindetterin oryndaýmen qatar, azamattardyń quqyq qorǵaý organdarynyń jumysyn jaqsartý jónindegi usynys-pikirlerin tirkeıdi. Quqyq qorǵaý organdarynda buryn-sońdy mundaı azamattardy qabyldaý front-keńseleri bolmaǵanyn eskersek, Departament basshylyǵy oblys turǵyndary úshin bul jańashyldyqtyń tıgizer paıdasy mol bolatynyna senim artady.

Jańa front-keńse óz jumysyn bastaǵannan keıin PD bastyǵy polısııa polkovnıgi Arman Orazalıev azamattardy jeke qabyldady, budan keıin osy kúni Taraz qalasynyń Polısııa basqarmasy men №2 qalalyq polısııa bóliminde ashylǵan jańa front-keńselermen tanysty.

Búgingi tańda front-keńse qyzmetkerlerine barlyǵy 5000-nan astam adam júgingen, olardyń barlyǵyna ýaqtyly quqyqtyq kómek kórsetildi, árbir ótinishke azamattar tolyqqandy jáne kásibı jaýap aldy.

Osylaısha, polısııanyń halyqpen jumys jasaýdaǵy engizilgen jańashyldyq úrdisi qoǵamdyq dıalogty uıymdastyrýdy aıtarlyqtaı jaqsartyp, azamattardyń qajettilikterine qatysty ashyqtyq pen jedel den qoıý qaǵıdattaryn iske asyrýǵa múmkindik beredi.