Toqaev: Jerdi eshkimge bermeımiz! Bizdiń halyq dana jáne óz aqylymen ómir súre alady

Memleket basshysy Qasym-Jomart Toqaev halyq arasynda tarap jatqan qaýesetke ermeýge shaqyryp, jalǵan áńgimelerdi joqqa shyǵardy, dep habarlaıdy Qamshy.kz aqparat agenttigi

"Sońǵy ýaqytta jer sheteldikterge satylyp, shet memlekettiń 55 eski zaýyty tasymaldanyp, oǵan myńdaǵan sheteldik jumysshy tartylady degen qaýeset tarady. Bizdiń halyq mundaıǵa senbeýi kerek. Mundaı qaýesetti adamdardyń patrıottyq kóńil-kúılerin aıla-sharpyp, emosıonaldy, epatajdy adamdardy ózderiniń belgili bir maqsattaryna qol jetkizý úshin qaskóıler qoldanady", –  dep málimdedi Toqaev Ulttyq qoǵamdyq senim keńesiniń otyrysynda.

Prezıdenttiń aıtýyna qaraǵanda, mundaı jaǵdaıda emosııaǵa tez beriletin, sengish, ańqaý adamdardy paıdalanyp jatady. Sóıtip, óz maqsattaryna jetýge tyrysady.

"Bizdiń halyq dana jáne óz aqylymen ómir súre alady. Bıliktiń mindeti – qoǵammen dıalog arqyly memlekettik saıasattyń maqsattary men mindetterin túsindirý, ony biz kóbine nashar oryndap jatamyz. Aqyl-oı men usynystardy eskerý, qabyldaý. Men taǵy qaıtalap aıtamyn, biz jerdi eshkimge bermeımiz jáne árdaıym halyqty tyńdap otyramyz", – dep sendirdi Prezıdent.

"Bundaı manıpýlıasııalar geosaıasattyń bir bólshegi ekenin de túsiný kerek. Negizgi maqsat – halyqtyń birligin buzyp, Qazaqstandaǵy jaǵdaıdy turaqsyzdandyrý. Alaıda biz dana halyqpyz jáne ondaıdy ajyrata alamyz. Al bıliktiń negizgi mindeti – dıalog arqyly halyqqa memlekettik saıastattyń maqsattaryn jan-jaqty túsindirý. Shyny kerek, dál osy jumysty keı kezde durys istemeımiz", – dep atap kórsetti Toqaev.

"Biz ulttyq múddeni qashanda birinshi orynǵa qoıamyz. Taǵy da shegelep aıtamyn, jerimizdi eshkimge bermeımiz, halqymyzdyń muń-muqtajyn árqashanda eskeremiz, basty nazarda bolady. Sheteldik ınvestısııalar tek qajetti salalarǵa ǵana tartylady. Jalpy, sheteldik ınvestısııalarsyz damýshy memleketter ómir súre almaımyz. Japonııa, Malaızııa, Sıngapýr, Ońtústik Koreıa jáne taǵy basqa elder ınvestııalardyń arqasynda jetistikke qol jetkizdi ", – dedi Toqaev.