Qaraǵandy turǵyny 21 myń teńgeni alamyn dep sottalyp ketti

Qaraǵandy ákimdiginiń qyzmetkeri kópbalaly jáne turmysy tómen otbasylarǵa ataýly áleýmettik kómek kórsetýge arnalǵan qarjydan 1,6 mıllıon teńge jymqyrǵan dep habarlaıdy Qamshy.kz aqparat agenttigi Sputnik saıtyna silteme jasap.

"25 shildede "Qaraǵandy qalasy jumyspen qamtý jáne áleýmettik baǵdarlamalar bólimi" MM áleýmettik tólemderdi taǵaıyndaý jónindegi sektorynyń bas mamany J. Smaǵulova 3 jylǵa bas bostandyǵynan aıyryldy. Ol óziniń qyzmettik babyn paıdalana otyryp, ataýly áleýmettik kómek tóleýge ótinim bergen kezde basqa anketalyq derektiń ornyna óziniń jeke derektemelerin kórsetken jáne járdemaqyny alyp otyrǵan", - dedi Sybaılas jemqorlyqqa qarsy is-qımyl agenttigi 1-shi departamentiniń aǵa tergeýshisi Danııar  Bıgaıdarov. 

Smaǵulova barlyǵy 1,6 mıllıon teńge jymqyrǵan, bul qarajat áleýmettik jaǵynan osal 10 otbasyǵa AÁK retinde berilýi tıis bolǵan.  

Úkim sottalýshynyń balasy 14 jasqa tolǵanǵa deıin 5 jylǵa keıinge shegerilgeni habarlandy.

Aıta ketsek, osy jyldyń 1 sáýirinen bastap elimizde AÁK kórsetý mólsheri kúnkóris deńgeıiniń 50%-nen 70%-ne deıin kóterilip, 20 789 teńgeni qurady. Nátıjesinde járdemaqy alýshylar sany 571,6 myń adamnan 830 myń adamǵa deıin ósti. Bul rette, eger AÁK-tiń ortasha mólsheri buryn otbasynyń árbir múshesine 4 834 teńgeni quraǵan bolsa, endi ár balaǵa 20 789 teńge tólenedi.