• USD 378.65
  • EUR 430.07
  • RUB 6
  • CNY 55.1
23 Qyrkúıek, 20:20:07
"Shetelde oqý – ómirlik mıssııa men qyzmettik jolyńyzdy tanýǵa kómektesedi"

02 Qyrkúıek, 2019 Barlyq aımaqtar

Qasym-Jomart Toqaev Joldaýynda mádenı salamyzǵa asa mán berdi

Doshan JOLJAQSYNOV, Qazaqstan Respýblıkasynyń Halyq artısi

 

Mádenı salamyzǵa asa mán berdi

 

Memleket basshysy Qasym-Jomart Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna Joldaýy álemdik qaýymdastyqtyń bir bólshegine aınalǵan egemen elimizdi jańa jetistikterge jeteleıdi. Jańa tarıhı kezeńge jol ashatyn bul tarıhı qujattyń táýelsizdigimizdiń tól tarıhyndaǵy mańyzy bólek. Prezıdent óziniń Joldaýynda qazirgi qoǵamdaǵy birqatar mańyzdy máselelerge toqtalyp ótti. Qazaq tiliniń taǵdyry, «Dıplommen – aýylǵa» baǵdarlamasynyń aıasyn keńeıtý, az qamtylǵan jáne kóp balaly otbasylardy qoldaý úshin Daryndy balanyń qabiletin damytýdyń jol kartasyn ázirleý, mádenıet salasynyń qyzmetkerlerin qoldaý týraly aıtylǵan ózekti oı-pikirleri jurtshylyqtyń júregin jylytyp, kóńiline rýhanı kúsh-qýat quıǵany kúmánsiz.

Prezıdent Joldaýynda aıtylǵan anashany taratý, adam zorlaý, pedofılııa, adam saýdasy tárizdi aıtylǵan máseleler búgingi tańda jahan júzindegi adamzat balasynyń dertine aınalǵany aqıqat.   

Elimizdiń jaǵdaıyn jaqsartýǵa baǵyttalǵan Joldaýynda Prezıdent kelesi jyly Abaı Qunanbaıulynyń 175 jyldyq mereıtoıyn atap ótetinimizdi aıtty. Budan buryn Prezıdent alyp Abaıdyń mereıli merekesi IýNESKO dárejesinde atap ótiletindigin aıtyp, qazaq halqyn qýantqan bolatyn. Jaratylystyń qupııasyna, tabıǵat pen qoǵamnyń, adam men zamannyń syryna tereń boılaǵan kemeńger Abaı – júregimizdi nasıhatymen nurlandyratyn, boıymyzǵa rýhanı qýat quıatyn, rýhanı nár beretin danalyǵy darııadaı danyshpanymyz. Abaıdyń Jıdebaıdaǵy murajaı-úıi – Abaıdyń ómiri men shyǵarmashylyq jolynan tolyq maǵlumat beretin mádenı mekeme. Alaıda, alyp Abaıdyń ǵıbratty ǵumyrynan syr shertetin kıeli de qasıetti jer qazir kútim jasaýdy qajet etedi. Hakim Abaıdyń izgi izi qalǵan qasterli mekenniń aınalasy ásem gúlge tolyp, aqynnyń jaýhar jyry, nur tunǵan nasıhaty  adamnyń júregi men jan-dúnıesin jylytyp turýy tıis. «Qunanbaı» fılmin túsirip júrgen kezde Abaıdyń  Jıdelisinde boldyq. Abaı men Shákárimniń ónegeli ómiriniń bir bólshegi bolyp tabylatyn bul qasıetti de qasterli meken jańǵyryp turýy tıis. 2018 jyly mamyr aıynda Elbasy Nursultan Nazarbaevtyń qabyldaýynda bolǵanda hakim Abaıǵa qatysty osy máseleler týraly oı-pikirlerimdi aıtqan edim. Abaı men Shákárimniń qazaqtyń tarıhymen tamyrlas taǵylymdy shyǵarmalary oryndalyp, qasıetti mekenniń shyraıyn kirgizip, shýaǵyn shashyp turǵany abzal. Shaıyrlardyń shyǵarmalary álem tilderinde shyrqalyp tursa qandaı ádemi! Sonda Jıdebaıǵa barǵan árbir adam aqyn jyrlary arqyly Abaı álemine tereń boılap, kóńili teńizdeı tasyp, erekshe áser alyp qaıtatyn edi. Árbir sáýleli sózinen alyp Abaıdyń júreginiń lúpili men tamyrynyń búlkilin sezetin edi. Negizi, jaı ǵana baryp, kórip, qaıtqannan adamnyń kóńilinde eshqandaı sezim, ádemi áser qalmaıdy. Al kıeli topyraqqa tabany tıgen adam qaı jerge kelgenin jan-dúnıesimen sezinip, oı-sanasymen tereń túsiný kerek. Elbasymen kezdesýde mine osyndaı usynystardy aıtqan edim. Abaıdyń rýhyn jańasha jańǵyrtýda bul usynystarym eskeriler degen úmittemin.

Qazaq halqy árqashan boı túzeıtin, oı túzeıtin Abaı atty asqarymyzdyń murajaı-úıiniń shýaǵy shashyrap, shartarapty shyraılandyryp turǵany abzal. Abaı sóziniń sáýlesi urpaq sanasyn nurlandyryp, jastardy taǵylymdy tárbıeleýge ıgi yqpal etetini aqıqat.        

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir