Tarazdyń ataýy sońǵy 200 jylda 5 ret aýysqan

2000 jyldan astam tarıhy bar Taraz qalasynyń ataýy HIH ǵasyrdyń ortasynan beri 5 ret ózgergen. Ári saıası júıeniń aýysymen onyń baǵynyshty ákimshilik aýmaǵy da talaı ózgeriske ushyrap otyrǵan dep jazady Qamshy.kz aqparat agenttigi. 

1867 jyly «Jetisý men Syrdarııa oblystaryn basqarýdyń ýaqytsha erejesi» bekitilip, burynǵy Syrdarııanyń shekara mańy aýdandary men Qoqan handyǵy quramyndaǵy 7 ýezdi biriktirý jolymen jańa Syrdarııa oblysy quryldy. Qoqan handyǵy quramyndaǵy 7 ýezben birge Áýlıeata ýezi de Syrdarııa oblysyna birigedi. Arada jarty ǵasyr ýaqyt ótken soń Qazan tóńkerisi oryn alady. Bul saıası oqıǵa patshalyq Reseı memleketiniń túze búgip Keńes odaǵynyń qurylýyna áser etti. Jańa memlekette jańa saıası júıe jáne basqarýdyń tyń tásili qoldanylady. Osylaısha Áýlıeata ýezi Syrdarııa oblysynyń ákimshilik aýmaqtyq bólinisi retinde Túrkistan ASSR-nyń quramyna kirdi. Al 1924 jyly QazaqASSR paıda bolýymen Áýlıeatanyń ýeziniń ákimshilik baǵynyshtylyǵy qaıta ózgerdi. 1928 jyldyń 17 qańtarynda Áýlıeata ýezi bolystarǵa taratylyp onyń negizinde Syrdarııa okrýginiń aýdandary quryldy. Búgingi Taraz qalasy, Jýaly, Merki, Sarysý, Talas, Shý aýdandarynyń ákimshilik aýmaǵy osylaı paıda bolǵan edi.

1932 jyldyń aqpanynda Qazaqstanda jańa ákimshilik-aýmaqtyq birlik retinde oblystar paıda boldy. Dál osy tusta qazirgi Jambyl oblysynyń aýmaǵy kórshiles jatqan 3 oblystyń aýmaǵyna endi. Máselen, Áýlıeata (qazirgi Taraz qalasy), Jýaly, Merki, Talas aýdandary Ońtústik Qazaqstan oblysyna jatqyzyldy. Al Sarysý aýdany Qaraǵandy oblysynyń quramyna kirse, Shý men Qordaı aýdandary Almaty oblysynyń quramyn tolyqtyrdy.

1936 jyldyń qańtarynda 200 jyl boıy Áýlıeata atanǵan shaharǵa Qazaqstan ólkelik partııa komıtetiniń hatshysy bolǵan Mırzoıannyń aty berildi. Degenmen bul ataý partııa belsendisiniń kózi tirisinde aq (1938 jyldyń 3 maýsymynda) Djambýl (Jambyl) dep aýystyrylady. Ile shala QazaqKSR Joǵary keńesiniń jarlyǵymen (1939 jyldyń 14 qazanynda) qurylǵan oblys ta Djambýl (Jambyl) oblysy dep ataldy.

Táýelsizdiktiń alǵashqy jyldarynda Qazaqstan Respýblıkasynyń Mınıstrler Kabıneti janyndaǵy memlekettik onomostıkalyq komıssııa orys tildi ataýlardy transkrıpsııalaý týraly jarlyq shyǵaryp (1993 jyldyń 5 sáýiri) Djambýl oblysy Jambyl oblysy al Djambýl qalasy Jambyl qalasy dep ózgertildi.

1997 jyldyń 8 qańtarynda jergilikti atqarýshy bılik organdarynyń ótinishi men kópshiliktiń talap tilegin, Qazaqstan Respýblıkasy Úkimeti janyndaǵy memlekettik onomastıkalyq komıssııasynyń qorytyndysyn eskergen Memleket basshysy Jambyl qalasyna tarıhı Taraz ataýyn qaıtarý týraly Jarlyq shyǵardy.