Jambyl oblysynyń eltańbasy 20 jyl buryn bekitildi  

Búginde Jambyl oblysyn aıshyqtaý maqsatynda qoldanylyp júrgen eltańbasy óńirdiń qurylǵanyna 60 jyl tolýy qarsańynda 1999 jyly 23-shildede bekitilgen. Oblystyń eltańbasynyń avtory Qazaqstan Respýblıkasy Sáýletshiler odaǵynyń múshesi Salaýat Dembaı bolyp tabylady dep jazady Qamshy.kz aqparat agenttigi. 

Arhıvte saqtalǵan Jambyl oblystyq máslıhaty men oblys ákiminiń sheshimine №1qosymshada eltańba jaıynda tolyq sıpattama berilgen. Mundaǵy tolqyn men sý beınesi oblys aýmaǵyndaǵy Shý men Talas ózenderiniń aıdyndy shalqaryn aıshyqtaıdy. Sondaı-aq eltańbada oblysta ornalasqan Alataý men Qarataýdyń bıik shyńdaryn, asqaqtyǵyn tańbalaıtyn sımvoldar da úılesimmen oryn tapqan. Sonymen qatar oblystyń eltańbasynda ártúrli sımvoldarmen yntymaqtastyq pen jarasymǵa qurylǵan otbasy qundylyqtary, óńirdiń tabıǵı baılyqtary, áleýmettik-ekonomıkalyq damýy sıpattalady.

Jalpy sáýletshilermen sýretshiler arasynda oblystyń rásimine laıyqty nusqasyn ázirleý baıqaýy óńir basshysynyń 1999 jyldyń 19 naýryzdaǵy ókimimen jarııalanǵan eken.

Al baıqaý jeńimpazy bolyp tabylǵan sáýletshi Salaýat Dembaı da Jambyl oblysynyń týmasy. Ol 1975 jyly qazirgi Q.Sátbaev atyndaǵy Qazaq Ulttyq tehnıkalyq ýnıversıtetiniń sáýlet-qurylys fakýltetin bitirgen. Sáýletshi retinde Jambyl oblysynyń qala qurylysy salasynda qyzmet etip, onyń sáýlettik kelbetin jaqsartý isinde iz qaldyrǵan tulǵa. Sondaı-aq ár jyldary Jambyl oblysynyń qurylys komıtetin basqaryp, áýeli Taraz qalasynyń keıinnen tutas oblystyń bas arhıtektory bolǵan. Sondyqtan da sáýletshiniń oblystyń eltańbasyn jasaý kezinde onyń áleýmettik-eknomıkalyq ómirinen jan-jaqty habardar bolǵanyn senimmen aıtýǵa bolady.

Ol Jambyl oblysynyń eltańbasynyń avtory bolýymen birge Taraz qalasyndaǵy «hıbbatýla Tarazı» ortalyq meshitimen, Áýlıeata shaharynyń kireberis qaqpasymen, saıası qýǵyn-súrgin qurbandaryna arnalǵan eskertkishterdiń jobasyn jasaǵan. Sáýletshi retinde Taraz qalasynyń ortalyq alańynda turǵan Báıdibek eskertkishi men qazir «Erlik» memorıaldy keshenine kóshirilgen Baýyrjan Momyshulynyń eńseli eskertkishiniń jobasynda qoltańbasyn qaldyrǵan. Munan bólek oblystaǵy birqatar aýdan ortalyǵyndaǵy Jambyl Jabaev, Turar Rysqulov, Kenen Ázirbaev eskertkishteriniń de avtory bolyp tabylady.