Tarazdaǵy "Dańq" zaly óshpes erlikke qoıylǵan eskertkish  

Taraz qalasyndaǵy «Dańq» zaly Uly Otan soǵysynyń tarıhynan syr shertetin birden orynǵa aınalmaq. Qazirdiń ózinde munda 1,5 mıllıon astam maıdan dalasynda túsirilgen foto jáne maıdangerlerdiń, Sovet Odaǵynyń Batyrlarynyń jeke zattary, medaldary men ordenderi qoıylǵan. Munan bólek zalda Halyq qaharmany Baýyrjan Momyshulynyń ǵylymı-zertteý ortalyǵy da jabdyqtalǵan dep jazady Qamshy.kz aqparat agenttigi. 

Taraz qalasynda ótken jyly oblys ákimi Asqar Myrzahmetovtiń bastamasymen qolǵa alynǵan qurylystyń alǵashqy nátıjesi retinde «Erlik» memorıaldyq kesheni paıdalanýǵa berilgeni belgili. Sol kezde memorıaldyq keshenniń atyn zatyna saı etý maqsatynda munda Taraz qalasynyń ár qıyrynda turǵan Baýyrjan Moshyshulynyń eńseli eskertkishi men «Máńgilik alaý» kóshirilgen-di.

Al aǵymdaǵy jyly Jeńis kúni qarsańynda munda «Dańq» zaly esigin aıqara ashty. Sán saltanatty jarasqan eki qabatty ǵımarattyń aýmaǵy 1500 sharshy metrdi quraıdy. Onyń alǵashqy qabatyndaǵy vıtrınalarda jambyldyq maıdangerlerdiń jeke qujattary men qarýlary, jeke zattary qoıylǵan. Sondaı-aq munda maıdannan jazylǵan hattardy, taratylmaı qalǵan qara qaǵazdardy tabýǵa bolady. Arasynda tyl eńbekkerleri qoldanǵan qural-saımandar da jetip jatyr.

«Dańq» zalynyń ekinshi qabaty Uly Otan soǵysynyń dańqty qolbasshy, Jýaly jerinen shyqqan qazaqtyń birtýar perzenti Baýyrjan Momyshuly atyndaǵy ǵylymı-zertteý ortalyǵy etip jabdyqtalǵan. Bul ǵylymı-zertteý ortalyǵy qazirdiń ózinde respýblıka aýmaǵyndaǵy barlyq arhıvter men alys-jaqyn shetelderdiń arhıvterinde jatqan batyr Baýyrjan Momyshuly jaıyndaǵy qundy qujattardy jınaýmen aınalysýda. Bolashaqta bul qundy derekter negizinde jáne qaharmannyń qalamynan týǵan týyndylarynyń 100 tomdyǵyn jaryqqa shyǵaryp, qalyń oqyrmanǵa usynylmaq.

«Danq» zalynda Baýyrjan Momyshuly atyndaǵy ǵylymı-zertteý ortalyǵynyń jabdyqtalýyn batyrdyń kelini, jazýshy Zeınep Ahmetova erekshe qýanyshpen qabyldaǵanyn aıtady.

–Atam marqum«Men ólgennen keıin de tirilerdiń ishinde júremin», deýshi edi. Minekı, búgin ata aramyzda júrgendeı. Rýhy, qasıeti, barlyǵy qasymyzda. Qazaq: «О́tkenderin eskergen – óskendiktiń belgisi, ótkenderin umytqan – óshkendiktiń belgisi» deıdi. О́sip-ónip jatqan elmiz. Sondyqtan halqymyzdyń ómirindegi árbir úlken isterdi, erlikterdi jastarymyzǵa úlgi etip, urpaǵymyzdy sol atalardyń bıik rýhy, qasıetti árýaǵyna laıyq, solardan úlgi-ónege alatyndaı etip tárbıeleý – búgingi kúnniń mindeti. Myna is te sol ósip kele jatqan býynnyń ótkenin umytpaý úshin jasalyp jatqan tirlik, – dep aǵynan jaryldy Z.Ahmetova.