• USD 378.65
  • EUR 430.07
  • RUB 6
  • CNY 55.1
21 Qyrkúıek, 01:24:36
Kevın Gaston: Bul tabıǵattyń qurdymǵa ketýi degen sóz

22 Tamyz, 2019 Áleýmet

Jol azaby: Dóńgelekter jarylyp jatyr (vıdeo)

Taldyqorǵannan Balqash kóline qatynaıtyn kúre joldyń qurylysy 2 jyl boıy turalap tur. Sonyń saldarynan kólge demalýǵa baratyn týrıster sany da kúrt azaıǵan dep habarlaıdy Qamshy.kz aqparat agenttigi Eýrazııa arnasyna silteme jasap. 

Odan bólek, jol boıyndaǵy 5 aýyldyń turǵyndary jol azabyn tartyp otyrǵandaryn aıtady. 30 mlrd teńge qarjy jumsalatyn bul joba taǵy qansha ýaqytqa sozylmaq? 

Taldyqorǵan arqyly Balqash kóline baratyn joldyń jaıyn aıtsa, júrgizýshiler jylap qoıa beredi. Eki jyldan beri ábden zardabyn tarttyq, deıdi. Onyń ústine merdiger mekeme 141 shaqyrym joldyń 35 shaqyrymyn eski asfaltymen qosa, qyryp tastapty. 

"Dóńgelekter jarylyp jatyr. Qyrly-qyrly tastar tógip tastaǵan. Qyrly tastar qıyp jiberedi. Sonyń bárin aýystyramyz. Jasaımyz. Eshkimde jumys isteıin degen nıet joq. Áıteýir bári joldy shashyp qoıyp jatyr. Jumysynan nátıje kórip jatqan joqpyz", - deıdi kólik júrgizýshisi Kúmisbek Jaqsybekov. 

Jol jóndeý jumysy óte baıaý. Osy ýaqytqa deıin ótkelder men kópirler ǵana salynǵan. Munymen qosa, 5 shaqyrymǵa jeter-jetpes aýmaq asfalttalypty. Alaıda, onyń ózi qoldanysqa berilmegen. Eń soraqysy jol qurylysyna barhan qumy paıdalanylyp jatyr, - deıdi jergilikti jurt. 

Al, jol jóndeýshiler qumdy tek aınalma jol salýǵa paıdalanyp jatqandaryn aıtyp aqtaldy. 

"Barhan qumyn paıdalanýǵa bola ma? Bul jol emes qoı. Aınalma jol. Basqa jerde joldyń astyna salynyp jatyr ǵoı? Jolǵa salynǵan ne qum? Ony basqalarǵa aıtyńyz. Maǵan emes", - dedi "Jol" JShS masteri (ýchaske bastyǵy) Úsen Qadyrov. 

Al, Kóltaban aýylynyń turǵyny Ádil Ábdiraqynov jol jasaǵany bylaı tursyn, aınalmasyn salyp, egistik jerlerimizdi jaramsyz etti, - dep ashynyp otyr. 

Jyrǵa aınalǵan jol máselesi qazir Balqashta týrızmniń damýyna múmkindik bermeı tur. Kúrdeli jóndeý jumystary bastalǵaly kólge keletin demalýshylar sany da birshama azaıǵan. 

"2018 jyly bizdiń Balqash kóliniń jaǵalaýynda 25 000 halyq demalyp qaıtatyn. Bıyl ondaı emes. Kóbine avtobýstar júrmeıdi. О́z kólikterimen baratyn týrıster sany da azaıady ma dep otyrmyz", - deıdi Almaty oblystyq týrızm basqarmasynyń bólim basshysy Baqytjan Orazbaev. 

Jolǵa jaýapty mamandardyń pikirinshe, Taldyqorǵan-Lepsi baǵytyndaǵy jol 3 kezeń boıynsha jóndelmek. Iаǵnı, alǵashqy kezeńde 35 shaqyrym jerdi asfalttaý kózdelgen. Onyń ózi 2021-shi jylǵa deıin sozylady. 

"Jobany tolyǵymen aıaqtaý, jańa ózim aıtqandaı, jalpy 141 shaqyrym. Barlyq sommasy 30 mlrd-qa jýyq bolyp otyr ǵoı. Endi, bul qarajattyń bólinýine qaraı aıaqtalatyn jumys. Biraq, biz negizgi jospardy 2021 jyly bitirsek, dep oılaǵan bolatynbyz. Bul 0-35-ti bitiremiz dep oılaımyn. Ol qarajattyń bólinýine sáıkes", - dedi Almaty oblystyq jolaýshylar kóligi jáne avtomobıl joldary basqarmasy basshysynyń orynbasary Ǵalymjan Dáribaev. 

Jol qurylysyn tolyǵymen aıaqtaý máselesi qomaqty qarajatqa tirelip tur. Eger 3 jylda 35 shaqyrym aýmaq jóndelse, qalǵan 100 shaqyrymyn retke keltirý jumystary biraz jylǵa sozylatyn syńaıly.

 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir