Jambyl oblysynyń 21 myń turǵyny latyn negizdi álipbıdi túsindirý sharalaryna tartyldy  

Jyl basynan beri jambyldyqtarǵa latyn negizdi álipbıdi túsindirý maqsatynda 73 is-shara ótkizilgen. Bul sharalarǵa oblystyń 21 myń turǵyny tartyldy dep jazady Qamshy.kz aqparat agenttigi. 

Eldiń rýhanı ómirine qozǵaý salyp, qoǵam sanasyna silkinis ákelgen Elbasynyń «Bolashaqqa baǵdar: rýhanı jańǵyrý» maqalasynda qazaq tilin birtindep latyn álipbıine kóshirý jumystaryn týraly aıtyldy. Soǵan saı Úkimet basshysy 2025 jylǵa deıin kezeń-kezeńimen latyn negizdi álipbıge kóshirý jónindegi is-sharalar josparyn bekitti. Osy jospar negizinde oblystyq is-sharalar jospary túzilip, jambyldyqtardy latyn negizdi qazaq álipbıine baýlý jumystary júıeli jolǵa qoıylǵan.

Máselen M.H.Dýlatı atyndaǵy Taraz memlekettik ýnıversıtetiniń janynan latyn álipbıin úıretý oqý-ádistemelik kabıneti, Taraz memlekettik pedagogıkalyq ýnıversıtetinde «Qazaq fılologııasy jáne latyn grafıkasyn oqytý ádistemesi» kafedrasy, oblys ákimdiginiń tilderdi damytý basqarmasynyń Tilderdi oqytý ortalyǵynda «Rýhanı jańǵyrý: latyn álipbıi» kabıneti ashylyp jumys jasaýda. Bul ortalyqtarda til biliminiń bilikti mamandary jumystary tartylǵan. Olar turǵyndarǵa ádistemelik kómek kórsetip, jańa álipbımen qarip tanýǵa septigin tıgizedi.

О́tken jyly respýblıka aýmaǵynda bir mezette uıymdastyrylǵan jalpyhalyqtyq dıktant jazý sharasyna oblys boıynsha 127 myńnan astam adam qatysty. Sondaı-aq byltyr óńir turǵyndaryna latyn grafıkasyna negizdelgen qazaq álipbıin túsindirý maqsatynda oblys ákimdiginiń tilderdi damytý basqarmasynyń 4 áleýmettik jobasy qolǵa alyndy. Bul jobalar sheńberinde 120 is-shara ótkizilip, oǵan 150 myńǵa jýyq adam qamtyldy. Bıyl basqarmanyń bastamasymen 2 áleýmettik joba júzege asyrylyp jatyr.

Jalpy, Jambyl óńirinde Elbasynyń «Bolashaqqa baǵdar: rýhanı jańǵyrý» maqalasynan týyndaǵan maańyzdy mindet sanalatyn latyn negizdi qazaq álipbıine kóshý jumystary joǵary deńgeıde uıymdastyrylǵan. Byltyr jergilikti tilshi ǵalymdardyń bastamasymen arnaıy saıt iske qosyldy. Atalǵan saıtta latyn negizdi qazaq álipbıin oqytýdyń baǵdarlamasy da bar. Bul saıttaǵy baǵdarlamany ınternetti paıdalana alatyn oblystyń kez kelgen turǵyny paıdalana alady.