19 jastaǵy boıjetkenniń ólimi: "Ádildik izdep sharshadyq!"

«Ádildik izdep, sharshadyq!». Aqtóbe oblysynda jumbaq jaǵdaıda kóz jumǵan 19 jastaǵy boıjetkenniń týystary polıseılerdiń isti durys teksermeı jatqanyn aıtyp, shaǵymdandy dep habarlaıdy Qamshy.kz aqparat agenttigi Eýrazııa birinshi arnasyna silteme jasap.

Marqumnyń múrdesin jaqyndary aýyldaǵy bir úıdiń monshasynan taýypty. Alaıda olar qyzdarynyń ol úıge barmaq túgili, tipti jaqyn aralasqan adamdary emestigin aıtyp otyr. Al, saraptama qorytyndysynda boıjetkenniń  ıisten ýlanǵany jazylypty. Biraq, jaqyndary munymen kelispeı, múrdege eksgýmasııa jasap, naǵyz qylmyskerdi tapsyn dep otyr. 

Qaıǵyly oqıǵa osy jyldyń sáýir aıynda Badamsha aýylynda bolǵan. Sol kúni Juldyz túndeletip dámhanadaǵy jumysynan qaıtypty. Alaıda, úıine jetpegen. Qyzynyń óli denesi monshada jatqanyn anasyna kúndizgi 11-lerde habarlapty. Taýyp alǵan - monsha qojaıynynyń uly eken. Ol jerge boıjetkeniń qalaı barǵany, kimmen barǵany jaqyndaryna áli kúnge deıin jumbaq. Olar biraýyzdan qyzdy bireýler aldap shaqyryp alyp, qastandyq jasaǵan dep sanaıdy. 

"Eki jarym aı ótti, esh nátıje joq. Polısııa durys jumys istemeıdi. Olar  gazǵa ýlanǵan degen qorytyndy shyǵardy. Saraptamada gazǵa ýlanǵan dep bergen, biraq gaz ýchaskesiniń  normaǵa sáıkes degen qaǵazy bar. Olar áli kúnge taba almaı otyr qylmyskerdi. Izdegisi de kelmeıdi", - deıdi marqumnyń aǵasy Marat Tóleshov.

Istiń túsiniksiz tustarynyń kóp ekenin anasy da aıtýda. Tipti, kinániń bárin qyzyma artyp, jeńiljúristi qylyp kórsetkileri kelip otyr dep narazy. 

"Olar qyzymdy óz ajalymen óldi dep, isti jyly jaýyp qoıǵylary kelip otyrǵan shyǵar. Biraq, meniń júregim sezedi. Eshqandaı gazǵa ýlanbaǵan. Ony ádeıi óltirgen. Qyzymdy jeńil júristi qylyp kórsetkileri keledi, ol ondaı emes!" - dedi anasy Kenje Tóleshova.

Juldyzdyń jaqyndary onyń aqjarqyn, pysyq, oǵash qylyǵy joq bolǵanyn aıtady. Bıyl kolledjdi aıaqtap, dıplom alýy kerek edi.  

Tóleshovter polısııaǵa da, prokýrorlarǵa da shaǵymdanǵan. Ázirge esh mardymdy jaýap almadyq dep otyr. Al sot-medısınalyq saraptamasynyń qorytyndysyna kúmánmen qaraıtyn Juldyzdyń anasy máıitke eksgýmasııa jasaýdy talap etýde.