Qazaqstanda 3 myń ustaz ben dárigerge páter beriledi

Qazaqstanda 3 myń ustaz ben dárigerge páter beriledi. Atalǵan bastamany Qazaqstanyń ıpotekalyq kompanııasy qolǵa alyp otyr dep habarlaıdy Qamshy.kz aqparat agenttigi Sputnik Qazaqstan saıtyna silteme jasap.

Kompanııa basshysy Ádil Muhamedjanovtyń aıtýynsha, baǵdarlama sharttaryna sáıkes, árbir páter 20 jylǵa jalǵa beriledi. Alaıda baspanany kez kelgen ýaqytta eshbir aıyppulsyz merziminen buryn satyp alýǵa bolady. Kiristiń kólemi jetkiliksiz bolsa, kepilgerlerdi tartýǵa múmkindik bar. Bastapqy jarna salýdyń qajeti joq.

Osy baǵdarlama qatysatyn azamattardyń tizimin mınıstrlikter jasaıdy. Al Qazaqstannyń ıpotekalyq kompanııasy úmitkerlerdiń tólem qabilettiligin tekserip, jaldaý kelisimsharttaryn rásimdeıdi. Jospar boıynsha aldaǵy eki jylda 3 000 arendalyq páter taratylady. Ol ustazdar men dárigerler arasynda teń bólinedi.

"Biz aldymen mınıstrlikterdiń tizmin kútemiz. Odan keıin daıyn páterlerli satyp alamyz da, tizim boıynsha taratamyz. Páterlerdi satyp alýǵa 40 mıllıard teńgemiz bar. Bul – bıýdjettik emes qarajat. Bir páterdiń aýdany 80 sharshy metrden aspaıdy. Sosyn Nur-Sultan men Almaty qalalarynda bir sharshy metrdiń baǵasy  260 000 teńgeden aspaýy tıis. Al aımaqtarda atalǵan kórsetkish 220 000 teńgeden artyq bolmaýy shart", - deıdi Muhamedjanov elordada ótken baspasóz máslıhatynda.

Resmı málimetke sáıkes, 50 sharshy metrdi quraıtyn arendalyq páterdiń ortasha baǵasy 13 mıllıon teńge bolsa, 20 jyldyń ishinde aı saıyn 60-70 myń teńge tóleý kerek.

"Sosyn páterdi rásimdegeni úshin 1 prosenttik tólemaqy bar. Máselen, 13 mıllıon teńgeniń 1 prosenti – 130 000 teńge. Bul kóp aqsha emes dep oılaımyn. Osy somany bizdiń jumysymyz úshin tóleý kerek. Al jalpy jyldyq mólsherleme 3 prosentti quraıdy. Sebebi biz páterlerdi satyp alǵanda aqshany qaryzǵa alamyz. Ol shyǵyndardy da óteýimiz kerek", - dep atap kórsetti ol.

Aıta keteıik, búginde densaýlyq saqtaý salasynda 15 000 qyzmetker baspanaǵa zárý. Al  bilim salasynda 10 000 maman pátersiz júr.