Túpqaraǵan aýdany, Aqshuqyr aýylynda quny 800 mln teńgeni quraıtyn jel elektr stansııasy iske qosyldy

     Bul týraly О́ńirlik kommýnıkasııalar qyzmetiniń júrmeli brıfınginde Mańǵystaý oblysynyń energetıka jáne turǵyn-úı kommýnaldyq sharýashylyq basqarmasynyń basshysy Jandos Salımov málimdedi

«Qýaty 5 MVt quraıtyn keshenniń qurylysy barysynda 11 jumys orny ashyldy. Aldaǵy ýaqytta 20-dan astam jumys ornyn qurýǵa múmkindik bar»,-deıdi «BEST-Group NS» JShS kompanııasynyń ókilderi.  Atalǵan kompanııa stansııa qurylysyn 2017 jyldyń kúz aıynda bastaǵan. Montaj-qurylys jumystaryn otandyq mamandar jasap, zaýyttyń týrbınalary halyqaralyq sapa standarttaryna sáıkes sertıfıkattalǵan.

«Mańǵystaý oblysynyń ákimdigi bizge Túpqaraǵan aýdanynan jer telimin berdi. «Damý» qorynyń kepildigimen biz sýbsıdııalanatyn mólsherlememen bankten nesıe aldyq. Jobany sheteldik kompanııalar ınvestısııalaýda. Atap aıtqanda, osy jobanyń seriktesteri men ınvestorlary amerıkandyq jáne reseılik kompanııalar - Lone Star Renewable Energy Corp (AQSh) jáne «Energotehservıs» JShQ (Reseı). Jalpy jobany iske asyrýdaǵy basty maqsatymyz – jel elektr stansııalaryn paıdalaný arqyly negizgi energııa kózderin aýystyrý, Qazaqstandaǵy parnıktik gaz qaldyqtaryn azaıtý, sol arqyly klımattyń ózgerýi týraly BUU-nyń negizdemelik konvensııasyna sáıkes jumys jasaý. Endi bir aıdan soń biz óz ónimderimizdi sata bastaımyz. О́nimdi satyp alýshylar «Esepteý jáne qarjy ortalyǵy» JShS bolmaq. Germanııa elinde jasalǵan qondyrǵylardyń arqasynda stansııa, jel qýatyn paıdalaný arqyly elektr energııasyn óndirip, oǵan qajettilikti tolyq óteıtin bolady. Aqshuqyr aýylynyń turǵyndaryna sondaı-aq aýyl mańyndaǵy óndiris oshaqtarymen jylyjaılarǵa elektr qýaty tapshylyǵyn joıady» - deıdi jobanyń damý jónindegi dırektory Gúlnar Ábıtova.

Mańǵystaý oblysynda jańartylatyn energııa kózderin damytý baǵytynda birneshe jobalar iske asyrylýda. 2018 jyldyń mamyr aıynan bastap Munaıly aýdany, Batyr selosynda qýaty 2 MVt kún elektr stansııasy iske qosyldy. Budan bólek Túpqaraǵan aýdany, Fort-Shevchenko qalasynda eki birdeı joba iske aspaq. Maýsym aıynda paıdalanýǵa beriletin 42 MVt kún elektr stansııasy men jyl sońynda iske qosylatyn 43 MVt jel elektr stansııasynyń  qurylys-montajdaý jumystary qarqyndy júrgizilýde. Sonymen qatar qazirgi tańda energetıka mınıstrligimen úsh jobany júzege asyrý boıynsha jumystar jasaqtalyp jatyr. Olar Beıneý aýdany, Beıneý aýylynda, Qaraqııa aýdany, Jetibaı aýylynda, Mańǵystaý aýdany, Shetpe aýylynda qýaty 10-15 MVt qamtıtyn jel jáne kún elektr stansııasynyń keshendi jumystarynyń jospary daıyndalýda» - dedi Mańǵystaý oblysynyń energetıka jáne turǵyn-úı kommýnaldyq sharýashylyq basqarmasynyń basshysy Jandos Salımov

     «Jasyl ekonomıkany» damytýdyń basymdyqtarynyń biri jańartylatyn energııa kózderi bolyp tabylady. Memleket basshysy 2020 jylǵa deıin jańartylatyn energııa kózderiniń 3% -yn, 50 jylǵa qaraı 50% -yn qamtamasyz etýdi tapsyrdy. Bul óte aýqymdy mindet.