Tamaq – arsyz...

Bala kezimizde ortaǵa býy burqyraı kelgen tamaqqa asyǵystap qol sala bastasyń, ájemiz bilegińdi qaǵyp: «aldymen «bısmılla» de, sosyn nan úz, tamaq qaıda qashar deısiń?» dep tyıyp tastaıtyn. Sol ádet pe, qurandy jıyndarǵa barsam, ımam duǵa baǵyshtamaı dastarhanǵa tura umtylǵan adamdardyń áreketin ersileý kóremin. Tamaqqa shydamsyzdyq – nápsiniń bir túri.

Qazir ólim-jitim kóp. Azaly áýlet baqılyq bolǵan jaqynyna aǵaıyn-týysyn, jaqyn-jamaǵaıynyn, quda-jegjatyn shaqyryp, jetisinde, qyrqynda, jylynda as beredi. Kópshilik jıylǵan asty ımandylyq ashanalarynda bergen yńǵaıly, árıne. Bir mezgilde keledi, bir mezgilde qaıtady. Bir ókinishtisi, bataǵa erteleý kelgen jamaǵat dastarhanǵa otyrysymen-aq, ımam duǵasyn kútpeı, qasyq-shanyshqylaryn tárelkelerge súıkep, saqyrlata bastaıdy. Qaıda keldi? Ne maqsatpen keldi? Jaınaǵan dastarhandy kórgen soń barlyǵy ádirám qalǵan. Qatyrlatyp shaınap jatyr, sylqyldatyp jutyp jatyr. Beıne dýmandy toıǵa kelgen sııaqty. Álden ýaq ımamnyń quran baǵyshtaı bastaǵan úni estiledi. Bul kezde álgiler kekirinip, toıynyp-aq qalǵan. Maıly qoldarymen bet sıpap alyp, tamaq jeýge qaıta kirisedi. «Uıqy arsyz, kúlki arsyz, tamaq arsyz» deýshi edik, tym bolmaǵanda osyndaı azaly jıyndarda as nápsisin tyıýǵa erik-jiger taba almaǵanymyz ba? Álde, ár ústelge «ımam bısmılla desin de?» dep, bilekti qaǵyp otyratyn bir-bir ájeden otyrǵyzyp qoıamyz ba?

Bekjigit Serdáli