Atyshýly Ilıas Kar: Oqıǵa ornynan qashyp ketý oıymda da bolǵan joq

Almaty qalasyndaǵy úsh adamnyń ólimine sebepker bolǵan Ilıas Kar ózine taǵylǵan aıyptyń keıbirimen kelispeıtinin aıtty dep jazady Qamshy.kz aqparat agenttigi. 

"Men kinámdi jartylaı ǵana moıyndaımyn. Kólikti mas kúıinde júrgizdi degen aıyppen kelispeımin. Sondaı-aq meniń oqıǵa ornynan qashyp ketý týraly oıymda da bolǵan joq", dedi kúdikti. 

Prokýrordyń aıtýynsha, ishimdikke sylqııa mas bolǵan Kar Abaı kóshesinde batys baǵytta kele jatqan. Qaýipsiz jyldamdyqty tańdamaǵan jáne baǵdarshamnyń qyzyl túsine ótip ketken. Sonyń saldarynan túrli dene jaraqatynan úsh adam kóz jumdy.

Aıyptalýshy jaıynda belgili bolǵany, Ilıas Kar 1985 jyly týǵan. Otbasyly, úsh balasy bar. Bilimi orta. Ustalǵan sátte "Kazahprodýkt" JShS-de dırektor kómekshisi bolyp jumys istegen. Buryn isti bolmaǵan.

Eske salsaq,  29 jeltoqsanda Abaı men Seıfýllın kósheleriniń qıylysynda qaıǵyly jol apaty bolǵan edi. Asa qatty jyldamdyqpen kele jatqan Mercedes Gelandewagen kóligi baǵdarshamnyń qyzyl túsine ótip, Mitsubishi kóligin soqqan. Sonyń saldarynan úsh adam mert bolǵan edi. Onyń biri – aktrısa Sholpan Elgezekova. Taǵy bir aktrısa Aızada Satybaldıeva jaqynda ǵana emhanadan shyqty.

Usynǵan: Ásel Bolatqyzy