Berdibek Saparbaev aqtóbelik áıelge: Aıǵaılamańyz, úıińizge baryp aıǵaılańyz!

Mektepke muǵalim bolyp kirýdiń quny – 200 myń teńge! Al halyqqa qyzmet kórsetý ortalyǵyndaǵylar elektrondy sandyq qoltańbany 1000 teńdegen saýdalap, paıda kórip otyr! Aqtóbe oblysy ákiminiń esebinde osylaı dep shý shyǵarǵan qala turǵyny Berdibek Saparbaevtan tez arada máseleni sheship, ózin eki aptanyń ishinde jumysqa ornalastyrýdy talap etti. Bul qanshalyqty ras? Qaýeset pe, álde rasymen aqtóbelik mektep dırektorlary jurttan aqsha surap, dánikken be? Bul Qamshy.kz aqparat agenttigi týraly "Eýrazııa birinshi arnasynyń" deregin negizge alyp habarlaıdy. 

«Mektepterge baramyn, 200 myń teńge kóleminde para talap etedi. Qanshama kýágerler bar. Saparbaev myrza, sizge bir apta ýaqyt beremin. №60 mektep, Abzal Tájimishevti, ornynan alýyńyzdy talap etem!» – deıdi turǵyn Lázzat Badaýova.

Ashynǵan kelinshek ákim-qaralardyń aldynda tosylmady. Bar jaǵdaıdy osylaı jaıyp saldy. Jalǵyzbasty ana ekendigin, jumysynyń joqtyǵynan nesıege alǵan páteriniń aqysyn tóleı almaı otyrǵanyn jetkizdi. Oblys ákimine talap qoıýdan basqa amaly joqtyǵyn aıtty. Orta jolda sózin bólip, qolyndaǵy mıkrofonyn alyp, sabyrǵa shaqyrmaqshy bolǵandarǵa qulaq aspady. Sebebi, shaǵymy munymen bitpedi. Halyqqa qyzmet kórsetý ortalyǵynyń Almaty aýdanyndaǵy bólimshesinde basshysy elektrondy sandyq qoltańbany 1000 teńgeden satady, kserokóshirmeden paıda taýyp otyrǵanyn da osy kelinshek aıtty. Lázzat Badaýovanyń ár sózinen keıin esepke jınalǵandar dý qol shapalaq soǵýmen boldy.

«Sizderden suraıtynym, qaryndas, siz endi kishkene suraq qoıdyńyz ǵoı, suraq qoıǵannan keıin tyńdaý kerek! Aıǵaılamańyz, úıińizge baryp aıǵaılańyz!» – deıdi oblys ákimi Berdibek Saparbaev.

О́zin “para aldy” dep aıyptaǵan dırektory Abzal Tájimishov bastaýysh synyp muǵalimi Lázzat Badaýovamen qyzmettes bolǵanyn rastady. №60 mektepte nebári 9 kún jumys istepti. Ol "kezekshilikke shyqpaımyn" dep, mektep dırektorynyń orynbasarymen sózge keldi, dep otyr.

«Ol kisiniń aıtyp otyrǵan sóziniń bári – jalǵan. Men polıgraf, shyndyq detektorynan ótýge daıynmyn. О́zime senimdimin. Sol sózdi taǵy qaıtalap aıtam. Ol kisi osy jerde jumys istep ketti. Nege ketti? Ol kisi keshirim surap jylady. «Men ózime qol jumsaımyn, sizge kórsetemin» dep jazdy maǵan. Skrınderi bar, sizderge kórsettim. Osynyń bári sondaı jaǵdaımen aıaqtalyp, aqyr sońynda ol kisi jumystan aryzyn jazyp, ózi ketti», – deıdi Abzal Tájimishev.

Mektep dırektory endi óziniń sýdan taza, sútten aq ekenin sotta dáleldeımin dep daıyndalyp otyr. "Eldiń aldynda paraqor ataný maǵan da ońaı emes" deıdi. Halyqqa qyzmet kórsetý ortalyǵynyń bólimshe basshysynyń da osy kúnderi mazasy qashqan. Kelinshektiń aıtqany jalǵan ekenin ol da aıtyp otyr.

«Meniń atymdy aqsha jasap otyr dep aıtqan, elektrondy sandyq qoltańbany 1000 teńgeden satyp otyr dep shyqty, ol jalǵan aqparat. О́zderińiz kórip otyrǵandaı, ESQ memlekettik standarttar boıynsha tegin taratylady. Kserokóshirmeniń maǵan qatysy joq. Jeke kásipkermen ákimdik kelisedi. Myna jerde ashana, bank otyr. Onyń bári ákimshilikpen kelisimge otyrady», – deıdi Halyqqa qyzmet kórsetý ortalyǵy №3 bólimshesiniń basshysy Erkinbaı Júsipuly.

Qala ákiminiń esebinde ózin tolǵandyrǵan máseleni aıtyp, shendilerdi bir silkip alǵan kelinshektiń jaǵdaıy boıynsha jan-jaqty tekseris júrip jatyr eken. Bir qyzyǵy, osy oqıǵadan deıin Almaty aýdany halyqqa qyzmet kórsetý ortalyǵyndaǵy kserokóshirme apparatty ushty-kúıli joq qylyp jibergen. Al oblystyq bilim basqarmasynyń basshysy jumyssyz júrgen kelinshekti qala mektepteriniń birine ornalastyrý máselesin qarastyryp jatqanyn jetkizdi.

Usynǵan: Ásel Bolatqyzy