Jarylqap Qalybaı emes Táýelsizdik "sottaldy"

Búgin Gıtler jaıly materıal basyp, daýly bolǵan «Juldyzdar otbasy – Ańyz adam» jýrnaly boıynsha sot úkimi shyqty. Sheshim boıynsha, jýrnal redaktory Jarylqap Qalybaı aryzdanǵan 13 «ardagerdiń» árqaısysyna bir mıllıon teńgeden tólem tóleýge jáne soǵys ardagerlerinen jarııa túrde keshirim suraýǵa mindetteldi. Bizdiń biletinimiz, jýrnal ataýy «Abyz adam» emes, «Ańyz adam». Atalmysh nómirdiń muqabasyna «Adamzat ardageri» dep emes «Adamzat qasireti» dep jazylǵan. Jýrnalda bastan-aıaq Gıtlerdiń zulymdyǵy áshkerelenip, tek baspasóz qaǵıdasy boıynsha Naǵashybaı Esmyrza esimdi avtordyń «Gıtler – fashıst emes» degen jeke pikiri jarııalanǵan. Sotqa kýáger retinde tartylǵan Muhtar Shahanovtyń aıtqanyndaı, jýrnaldyń «óli Gıtler»  emes «kózi tiri» ózi týraly nómirindede ártúrli jurt pikirine oryn berilgen. Bul - táýelsiz jýrnalıstıkanyń zańy. Aldyńǵy joly Sot otyrysyna qatysqanda jigerimiz qum bolyp qaıtyp edi. Qalyń qazaq jıylyp, óli Gıtlerdiń arýaǵymen sottasyp jatty. Balanyń oıyny, baqsynyń jyny dersiń. Baıaǵyda súıegi qýrap qalǵan Gıtlerdiń qylmysy úshin tanymal jýrnalıst Jarylqap Qalybaıdy sotqa tartý – esh qısynǵa sımaıdy. Bul sottyń bir ǵana «paıdasy» boldy. Búgingi qazaq bıliginiń qanshalyqty masqara kúıge túskendigi, Alla bergen táýelsizdiktiń qaıdaǵy bir qaranıettilerdiń qoljaýlyǵyna aınalǵandyǵy, óz elinde, óz jerinde turyp jeke pikir aıtýǵa qazaqqa múmkindik berilmegendigi tarıhqa jazylatyn boldy. Iá, bul sot arqyly Jarylqap Qalybaı nemese «Ańyz adam» sottalǵan joq. Táýelsizdik "sottaldy". Sottalmaǵanda she? О́li Gıtler túgili tiri Pýtındi synaýǵa da bolmaıdy. Esesine «Uly otan soǵysyn» jalaýlatyp, Sovet odaǵynyń týyn kóterip júre berseń aqshaǵa da, basqaǵa da qaryq bolasyń.