QALAǴANYŃYZDY QALAM ÚIRETEDI (VIDEO)

Búgingideı jahandaný zamanynda qazaq balasyn qalaı tárbıeleımiz? Orystyń oıynshyǵy men qytaıdyń qýyrshaǵyn «azyq» etip júre beremiz be? Ult bolashaǵy – urpaq qamy úshin memleket ne istep jatyr, qarapaıym jurt ne jasap jatyr? Bul suraqtardyń jaýabyn tabatyn ýaqyt kelmek túgili ótip ketti... Aýyz toltyryp aıtatynymyz - Qydyráliniń «Balbalasy» ǵana ma? Aıtpaqshy, ulttyq dúnıe dese birden Qytaıdaǵy qazaqtardyń tirligi eske túsedi. Sóıleıtin álippe, sheshen dombyra, oıynshyq kıiz úı... Áıteýir qoldarynan kelgenin urpaqqa usynyp otyr. Mine, sondaı tálimi men tárbıesi ushan-teńiz quraldyń biri – «Qasterli qalam».

«Álippe», «О́leń», «Maqal-mátel», «Esep», «Ertegi», «Ulylardan ulaǵat», «Áıgili adamdar», «Jańyltpash», «Jumbaq», «Bilgenge marjan», «Kel balalar oqylyq» deıtin 11 dápterden turatyn toptamany «Qasterli» dep atalatyn shaǵyn ǵana qalam sóılettirip jiberedi. Tipti, qabyrǵaǵa ilip qoıatyn álippı, kıiz úıdiń modeli, ártúrli mýzykalyq aspaptardy qamtyǵan pıanıno – bári-báride sol «Qasterli qalamnyń» arqasynda áýendete jóneledi. Eresek adam bilmeıtin kıiz úı jabdyqtaryn siz sol toqymdaı syzbadan bile alasyz. «Mynaý ne eken?» dep qalamdy apara qoısańyz «Basqur» dep sańq ete qalady. «Al mynaý ne?» dep taǵy bir túrtip qalsańyz, «Bul – kerege baılaý» dep túsindire qoıady.

Joǵaryda ataǵan 11 dápterdiń jóni múldem bólek. Balańyzǵa úıretem dep júrgen dúnıeniń bári sonda. «Ata» men «Apadan» bastap, qazaqtyń búkil ertegi-ańyzdaryn, maqal-mátelderin, óleń-jyrlaryn, esep-qısabyn, jańyltpashyn, tipti Alashtyń arǵy-bergi ardaqtylarynyń sýreti men aty-jónin, barlyq eńbegin sol  «Qasterli qalam» aıtady, balańyzǵa úıretedi.

«Qasterli qalam» jobasyn júzege asyrǵan «Zerek bala» kompanııasynyń dırektory Talapqan Pátiqanulynyń aıtýynsha, bul qazaq balalary úshin jasalǵan jumystyń alǵashqy baspaldaǵy ǵana kórinedi. Bir ǵana «Qasterli qalamnyń» ózindegi 11 dápterdiń qatary jyl saıyn tolyǵyp otyrady. Qolyńyzda «Qasterli qalam» bolsa ǵana bolǵany – jańa shyqqan árbir dápterdi tıyn-tebenge satyp alyp oqyta beresiz balańyzǵa. Eń bastysy, mundaǵy dybystaýlardyń barlyǵyn Qazaqstandaǵy bilikti dıktorlar oqyǵan. Al mazmun pen árip fılolog ǵalymdarynyń saraptaýynan ótip, Qazaqstandyq túlekterge arnaıy daıyndalǵan. Qalam Germanııanyń tehnologııasymen jasalǵandyqtan ekologııalyq tazalyǵy ǵana emes, laqtyryp jiberseńiz synbaıtyn shydamdylyǵy da balalar úshin asa yńǵaıly. Bastysy sýǵa túsip ketpese bolǵany.

 Aıtpaqshy, Talapqan Pátiqanuly myrza taǵy bir jańalyǵymen bólisti. «Alla qalasa jaqynda «Meniń Prezıdentim» degen atpen taǵy bir dápter qurastyryp jatyrmyz. Búgingi jetkinshekter Qazaq eliniń tutqasyn ustaımyn, elim úshin qyzmet etemin dep ósý kerek. Ol úshin Nursultan Nazarbaevtyń eńbekqqorlyǵy men ulaǵatty sózderin urpaq sanasyna sińirý kerekpiz. Alla qalasa bul dápterdi 6 shilde Astana kúnine deıin úlgertip jasaýǵa kirisip jatyrmyz. Maqsatymyz - bar dápterdi árbir qazaq balasynyń qolyna tıgizý. Eger qandaı da bir olqylyqtar baıqalyp jatsa, ony eskerýge, túzetýge daıynbyz», – deıdi ol.

Haziret Ábdilda