"Azban aıǵyr enesine shabady"...

Halyq jazýshysy, aqyn Oljas Súleımenov keshe ulttyq kitaphanada óziniń  mereıtoıyna arnalǵan  jıynda tańqalarlyq málimdeme jasady.  Túrki tilderiniń qyr-syryn  zerttegen  ǵalym  "mamyr", "jeltoqsan", "májilis" sekildi qazaqsha  ataýlarǵa qarsy ekenin  aıtty, dep jazady zakon.kz

    "Biz  jyl saıyn osy  zalda kezdesemiz. Mamyr emes,  maı aıynda. Men "mamyr" sózine  qarsymyn. Bul ataýdyń qashan  paıda  bolǵanyn bilmedim, biraq maǵan  "maı" dep  ataǵan unaıdy. "Maı" ataýy sharappen maǵynalas, parsy tilinde maı - sharap degendi bildiredi. Maı - bul sary maı. Qulaqqa jaǵymdy! Al, "mamyr" qurylys jáne qaldyqpen mándes qatysty arab sózi.   

Bizdiń til mamandarymyz  Keńes  odaǵy qulaǵan soń, birtalaı ataýlardy ózgertken bolatyn.   "Keńes" sózin májilis  degen jıyn degen maǵyna beretin arab sózimen aýystyrǵan edi. Alaıda, keńes  degen sóz  yqylym  zamannan kele  jatqan ataý ekenin umytpaýymyz kerek. "Keńes" - sovet degen  qalypty sóz. Álemniń kóp elderinde osylaı aıtylady. Al biz ony  almastyryp  aldyq. "Maıdy" da mamyr dep  ózgertti. Mamyrr-r-r-r. Qatań estiledi. Sol sııaqty, jeltoqsan - toqsan jel degendi bildiredi. Nege 80 emes, nege  dál 90? Al, aı ataýynyń túp-tamyry  qarluqtarda  jatyr: «soǵymaı» dep  ataǵan durys.  Mán-maǵynasy  qandaı  tereń, sol maýsymnyń barlyq  erekshelikteri syıyp tur. Osy  sekildi  halyqtyq ataýlarmen almastyrý kerek. 

  Men  bul aıdy maı  dep  ataýdy jalǵastyramyn. Maı aıynda  kóptegen jaqsy adamdar týylǵan. Máselen, Qasym-Jomart Toqaevtyń týǵan kúnine oraı, "Biz ekeýmiz mamyrlyq emes, maılyqpyz" dep úshbý hat jazyp, Parıjden quttyqtaý telegrammasyn joldadym. Ol sol kezeńde Qazaqstan Senatynyń tóraǵasy bolatyn. Ol kelisemin deı otyryp, 18 mamyr  dep  qol qoıypty. Bul zańdylyq ekeni  ras". 

Sóıtip, El aǵasy, Halyq jazýshysy Oljekeńniń bas qatyrar basty máselesi osy bolyp tur. Qazaqta "Azban aıǵyr enesine shabady" degen maqal bar. El azdy ma, er azdy ma? Ony jurt aıtsyn.