Bilimdilik orys tilimen ólshenbeıdi, mınıstr hanym!

     Ekonomıka jáne bıýdjetti josparlaý vıse – mınıstri Mádına Ábilkasymova nazaryna! 

      Mádına Ábilqasymova hanym, Sizdiń oralmandardyń bilimdilik deńgeıin qandaı kategorııalarmen ólshegenin biz bile almaı otyrmyz. Baıqaýymyzsha, shetelden kelgen qandastarymyzdyń orys tilin bilý deńgeıi bılik  úshin bilimdilik bolyp esepteletin sııaqty. Aıtalyq, táýelsizdik alǵan jyldardan beri qanshama bilikti ǵalymdar ata-jurtqa oraldy. Qazir solardyń kópshiligi óz mamandyǵy boıynsha jáne basqa salada qyzmet etip jatyr. Bizdiń elde sheteldiń ozyq bilimin ıgergen ǵalymdar úshin Qazaq elinde eshqandaı jaǵdaı jasalmaǵan. Tek orys tilin bilseńiz ǵana óz salańyz boıynsha jumys atqarýǵa bolady. Onsyz barlyq esikter tars jabyq.

Sondyqtan, elge oralǵan qandastarymyzdyń biliktiligin paıdalanýǵa eshqandaı jaǵdaı jasamaı turyp, olardyń kóbi saýatsyz deý esh aqylǵa syımaıdy. Dúnıejúzilik tájirıbege súıensek, ǵylymdy, óndiristi, ekonomıkany sanaýly adamdar alǵa súıreıdi. Eger bizdiń Qazaqstan jurty sonshalyqty saýatty bolsa, nege osy kúnge deıin ekonomıkamyz órkendep nemese ǵylymı jańalyq jaratyp, "Nobel" syılyǵyn ala almaı otyrmyz?  Osy turǵyndan alǵanda, biz eń aldymen sheteldiń ozyq ǵylymyn ıgergen qandastarymyzdyń tıisti orynǵa jaıǵasyp, óz salasy boıynsha qyzmet atqarýǵa jaǵdaı jasaýǵa tıispiz. Tıisinshe, eginshiler men malshylarǵa da tıimdi orta jaratýǵa mindettimiz.

Iаǵnı, bilimdilik degen Mádına hanym aıtqandaı, sandar men sıfrlardan turmaıdy. Sapadan quralady. Táýelsizdik jyldarynan beri elge oralǵan qandastarymyzdyń óndiristiń ár salasynda tabysty jumys jasap jatqanyna bárimiz kýámiz. Oǵan kóz juma qaraýǵa áste bolmaıdy. Sóıte tura, «Qazaq kóshin» bilimdilik pen bilimsizdikke tirep qoıý naǵyz saýatsyzdyqtyń ózi.

Eger Mádına hanymnyń ýaqyty bolsa, sheteldegi qazaqtarmen tyǵyz jumys jasap jatqan «Qamshy» saıtyna qarasyn. «Ol – qazaq» degen aıdarda shetel qazaqtary týraly tushymdy jazylǵna. Qanshama bilikti qazaqtar shetelde júr. Qanshaýy elge oraldy. Bilimdilik orys tilimen ólshenbeıdi, mınıstr hanym! Eger «qazaq kóshi» týraly, «oralmandar» týraly áńgime aıtý kerek bolsa, eń aldymen sol adamdardyń ortasyna kirip, olarmen pikir alysýy kerek. Tek qaǵazdaǵy sıfrlarǵa qarap sóz aıtsa, aırandaı uıyǵan jurttyń berekesine syzat túsirip, aǵaıyndy arazdastyrady. Memlekettik qyzmetker bola tura, mansapty sheneýnik bola tura osyndaı jińishke máselelerge atústi qaraý vıse- mınıstr hanymnyń ózi saýatsyz ba degen oıǵa jeteleıdi eken.

Báshir  Janaltaı,

Dúnıejúzi Innovasııalyq qorynyń Qazaqstandaǵy ókili