Arman bolǵan azamattyq

    Oralmandarǵa qatysty zań jobasy qabyldanyp, azamattyq alý bir jylǵa kemise, ata-jurtyna qonys aýdaratyn aǵaıyndarymyz 3 mıllıonǵa jeter edi. Astanadaǵy kóshi-qon komıtetiniń basshylary bolashaqqa osyndaı boljam jasady. Alaıda, oralmandarǵa jeńildik beretin zań jobasy áli ázirlený ústinde, Parlamentke de jetken joq,- dep  habarlaıdy "31-arna".

Kóshi-qon komıtetiniń basshylary atajurtqa oralǵysy keletin qandastyrymyzǵa jeńildik beretin zań jobasy jyl aıaǵyna deıin qabyldanady degen senimde. Biraq, qujat Májilis pen senat depýtattarynyń "synyna" ushyrap, jatyp qalýy da múmkin. Sondyqtan, azamattyqty bir jylda alý alystaǵy aǵaıyn úshin ázirge arman ǵana bolyp tur.  Hadısha Qaparbek esimdi dıplomdy oralman qyzǵa jańa qujat ázirge buıyrmaıtyn sııaqty. Búgin kóshi-qondaǵylar Hadısha Qaparbek qoldanystaǵy zań boıynsha azamattyq alýdy 4 jyl kútedi dep jaýap berdi.

ASLAN QARJAÝBAEV, QR Kóshi-qon komıteti tóraǵasynyń orynbasary:

Ol kisi qytaılyq pasportyn qaıta jańartqannyń ózinde jańa zań qabyldanǵanǵa deıin tórt jyl kútýine týra keledi. Jańa zań qabyldanǵannan keıin azamattyq alýǵa birden ótinish bildirýine bolady.

   Bul  "Kóshi-qon" týraly  zańǵa ózgeris  engizý rasynda da  uzaqqa  sozylatyn  sekildi.  Sebebi, EjÁQ mınıstri Tamara  Dúısenovanyń bastamasy tek usynys  qana. Al, qabyldanyp  ketken zań  jobasyna  ózgeris  engizý kúrdeli prosess.  Oǵan bılik basyndaǵylardyń asa  yntaly emes ekeni  de  baıqalady.   Bul týraly aıdyń basynda  Almaty qalasyndaǵy  Dúnıejúzi  qazaqtar  qaýymdastyǵy uıymdastyrǵan jıynda  uıym  tóraǵasy Talǵat Mamashev te zań jobasyna  ózgeris engizý ońaı emes ekendigin aıtqan  bolatyn:  "Sońǵy ýaqytta kóshtiń toqtap  turǵany  ras. Bizdiń «shash  al dese,  bas  alatyn» atqarýshy bılik sońǵy ýaqytta  kóshti toqtatýǵa tyrysty.  Ony jasyratyny joq. Alaıda, ótkende  Úkimettiń otyrysynan keıin Eńbek jáne áleýmettik qorǵaý mınıstri Tamara Dúısenova kóshi-qon salasyndaǵy eleýli jańalyqtar  men kósh máselesindegi ketken qatelikterdi aıtty. Degenmen, bul sol aıtylǵan kúnniń ertesine júzege asyrylady degendi bildirmeıdi. Sizder mynany túsinseńizder,  byltyr Kóshi-qon týraly zań qabyldanyp ketken, jáne  ol  zańǵa ózgertý engizý ońaı sharýa  emes. Úkimet oǵan  tıisti qaýlylaryn qabyldap, zańǵa tıisti ózgeristerdi engizý kerek. Bul  uzaq prosess", - degen bolatyn.

"Qamshy"  silteıdi