Jerdi jalǵa berý jańsaq qadam emes pe?

«Qazaqstan Qytaı azamattaryna jalǵa jer berdi» degen taqyryppen QazTAG aqparattyq agenttiginiń resmı saıtynda aqparat jaryq kórdi.

Aqparat agenttiginiń málimetine súıensek, QR Premer-mınıstriniń birinshi  orynbasary Baqytjan Saǵyntaev Ortalyq kommýnıkasııalar qyzmeti ortalyǵynda ótkizgen brıfınginde osy másele jaıynda habarlaǵan.

«Jer ýchaskeleri tek Qytaı Halyq respýblıkasy azamattaryna ǵana emes, Reseı azamattaryna da, ózge memlekettiń azamattaryna da bólinip otyr. Demek, bul jerde eshqandaı problemany kórip otyrǵan joqpyz», – degen Baqytjan Saǵyntaev myrza Qazaqstan Respýblıkasynyń Jer Kodeksi boıynsha shetel azamattaryna nemese shetel kompanııalaryna jer telimderin jalǵa berýge tyıym salynbaǵandyǵyn atap ótti.

«Ekinshi másele, jerdi shetel azamatyna jeke menshikke berý. Jer kodeksi boıynsha – shetel azamatyna jer telimderi tek on jylǵa ǵana jalǵa beriledi. Olardyń jekemenshigine jer satylmaıdy. Sol sebepti de, máselen, Aqmola oblysynda, Shyǵys Qazaqstan oblystarynda biz jer telimderin aýylsharýashylyǵy maqsatynda paıdalanýǵa bóldik. Olar qashan berilgenin, qansha gektar jer bólingenin biz bilemiz», –  degen ol.

Esterińizde bolsa, osydan bir-eki jyl buryn Qytaıǵa jer telimderin aýylsharýashylyǵy maqsatynda paıdalaný úshin 1 mıllıon gektardyń jalǵa beriletini jaıly aqparat taraǵan bolatyn. Alaıda, bul qazaq azamattary tarapynan qatty qarsylyqqa ushyrady. Sóıtip, qazaq úkimeti bul aqparatty joqqa shyǵarýǵa májbúr bolǵan. Máseleniń izi sýyǵandaı bolǵanymen, bıyl aqpan aıynda Elbasynyń qatysýymen ótken Úkimettiń keńeıtilgen otyrysynda Elbasy sheteldikterge jerdiń jalǵa beriletindigi jaıynda taǵy qaıtalady.

«Qazaqstanda jumys kúshi jetispeıdi, qytaı qaptap ketedi deıdi. Myń shaqyrym qubyr tarttyq, О́zbekstannan beri qaraı munaı qubyryn saldyq. Myń qytaı bir jylda saldy. Qubyrdy salyp bitirgen soń biri qalmaı ketti. Neden shoshıtyny bar?! Bir jyldyń ishinde myń shaqyrym qubyrdy kim salady, aıtyńdarshy?! Bul máseleni sheshý úshin ne qajet? Zańnamany ózgertý kerek pe, úkimettiń sheshimi qajet pe? Osyny shesheıik. Jerdi jalǵa berýdi 10 jyl dep belgiledik. Batysta 9 jyldan bastap elý, júz jylǵa beredi. On jyl degenge kim keledi? Bul jalǵa berý ǵoı, nesine qorqamyz? Nege jerdi durys paıdalanbaımyz? Bizden arabtar jer surap júr. Qytaılar da “jalǵa jer berińder, ónim óndireıik” deıdi. Aıtpaqshy, myna kórshi Qytaıda nashar jaǵdaıdyń ózinde gektaryna 30 sentner ónim alady. Biz olardan kembiz be?» – degen edi N.Nazarbaev.

Bul málimdemege halyq qatty narazylyq tanyta qoımaǵan bolatyn. Endi, mine, jerdiń jalǵa berilip úlgergendigi jaıynda aqparat taratylyp otyr.

 Esengúl KÁPQYZY

"Túrkistan" gazeti