Orys jastary: Qazaq memleketi bolǵan emes!

     «Maı merekesine» oraı, orystyń ultshyl jastary Reseıdiń birqatar qalalarynda sherýge shyqty. Máskeý jáne Peterbýrg qalalarynda olardyń sany myńnan asyp tústi. «Orys marshy» dep atalatyn sherýde jastar lozýng ustap, orys halqyn birigýge shaqyrdy. «Orystar, alǵa!» dep urandady.

Biraq, aıtaıyn degenimiz bul emes. Osy sherý barysynda orystyń qoǵamdyq belsendileri, ultshyldary «Qazaqstan degen el bolmaǵan» dep sóz sóılepti. Jırınovskıı, Lımonov, Shtygashevter aýyzdaryna túkirip qoıǵan ba, kim bilsin, endi Qazaqstandy joqqa shyǵarǵan orys jastary paıda boldy. Álgilerdi shal-shaýqan dep, mán bermeýge shaqyrǵan orys bıligi endigi jastarynyń mundaı sózderine ne der eken?

Dmıtrıı Demýshkın, «Orystar» qozǵalysynyń kóshbasshysy:

-         «Qazaqstan memleket retinde esh qashan ómir súrgen emes. Reseı ımperııasynyń kartasynan Qazaqstandy kórsetińizshi!? Qazaqstan degen el bolǵan emes! Bolshevıkter jasandy Qazaqstan men Ýkraınany qurdy».

Aleksandar Grýzınov, Horoshevo-Mnevnıka mýnısıpaldy aýdanynyń depýtaty:

- Ýkraına, Reseı, Belorýssııany aǵaıyn elder dep ataýǵa bolmaıdy. Olar bir aǵza, bir el. Bul orys ulty. Al, terrıtorııa máselesin aıtar bolsaq, Ýkraın, Belorýssııamen birge Soltústik Qazaqstannyń jeri de Reseıdiń baıyrǵy terrıtorııasy. Bul tarıhı fakt. Qazaq degen ult bolǵan emes. Ázirbaıjan sekildi qurama ult. Orys kazaktary mekendegen dala halqy. Qazaqtarda tipti jazý da bolmaǵan. Semeı jáne basqa aımaqtar orystyń jeri. Erte me, kesh pe, bular biryńǵaı memleket bolatyn bolady.