Eýrazııalyq Odaq. Reseımen Túrkistan bolyp sóılesýimiz kerek

Túrkistan respýblıkalary federatıvtik negizde birgýi tıis.  Jeke ambısııalaryn qaıyryp qoıyp, ortaq saıası qurylym jasaý týraly iske qazirden bastap kirisken durys. Áıtpese, «О́zbekpen birikkenshe, oryspen birge bolǵanym artyq» deýshiler qatary kóbeıgen saıyn, bul maqsatqa jetý múmkindigi alystaı beredi.

Eń aldymen, birinshi qadam – máńgilik dostyq sharttaryna qol jetkizý kerek. Qyrǵyzstanmen jasalǵany sııaqty bul shart О́zbekstanmen de (О́zbekpen keıinnen jasaldy),  Túrkimenmen de, Tájikpen de jasalýy kerek. Mustafa babamyz ylǵı da Tájikterdi túrkistandyqtarǵa, tipti  túrikterge qosyp otyratynyn kóremiz. Odan keıin federasııaǵa barý kerek. Biz oryspen de, qytaımen de, Túrkistan bolyp birlese aralasqanymyz jón.  Reseı de, Qytaı da óz yqpalyn ulǵaıtyp, bıligin júrgizý úshin, eń aldymen, bólshekteýge umtylady. Bizdiń aldymyzda úlken eki tańdaý tur: Oryspen nemese óz qandastarymyzben (ózbek, qyrǵyz, túrkimen t.b.)  birlesý.

Bul tańdaý  ótken ǵasyrdyń  basynda da boldy,  HHI ǵasyrda taǵy  ótkir qoıylyp otyr. Bizdiń bul joly qatelesýimizge haqymyz joq. «Bólingendi bóri jeıtinin»  HH ǵasyr jeterlikteı dáleldep berdi. Qazaq esin jıyp, bir jaǵyna shyǵýy, óz tegin, óz ulysyn, óz úıirin tabýy kerek.Tili de, dini de, dili de jat qytaı men orystan góri, bir atadan taraǵan, araz da bolsa týys-týmanyń  jaqyn ekenin seziner ýaqyt boldy ǵoı, aǵaıyn!

Men Eýrazııa  ıdeıasyn joqqa shyǵarmaımyn. Biraq ony qazaq – qazaq kúıinde, ózbek – ózbek kúıinde, túrkimen – túrkimen kúıinde, qyrǵyz – qyrǵyz kúıinde júzege asyra almaıdy. Sebebi, meni orysqa jutylyp ketý qaýpi shoshyndyrady. Teńdik, ádilettilik prınsıpteri myń ret qaıtalansa da, tıisti mehanızmderi jasalyp qoıylǵan kúnde de, orys orystyǵyn jasamaı tura almaıdy. Orystar basqa shaǵyn halyqtarmen teń bolýǵa daǵdylanbaǵan, ol – teńdikti qorlyq dep uǵýǵa úırengen halyq.

Aıtan Núsipqan aǵamyzdyń estelikterinen