Elbasy buıdasyn ustaǵan "Kósh" toqtamaıdy

  Keshe dramatýrg Dýlat Isabekov aǵamyz Elbasymen suhbat barysynda syrtta júrgen 5 mıllıon qandastarymyzdyń elge oralýǵa nıetti ekenin jetkizdi. Táýelsizdikti alǵannan beri elge oralǵan qandastardyń úlken bóligi aman-esen kelip, qonystanyp aldy. Búginde el ekonomıkasyna ár salada eleýli eńbek sińirip jatyr. Soltústik oblystardaǵy qalalar men aýdandardaǵy syrttan kelgen qandastarymyz qonystanyp, birshama qazaqylandyrǵanyn kórip júrmiz. Alaıda sońǵy jyldar kóshi-qon máselesi saıabyrsyp qalǵany jasyryn emes.

   Bul ózgeristerdiń kóbi alystaǵy aǵaıynnyń elge oralýyna tejeý bolyp jatqany ókinishti. Elbasy árbir quryltaıda qandastarymyzǵa qujat tapsyrýda, tirkeýge turýda, azamattyq alýda kezigetin túrli kedergilerdi joıýǵa jumys jasaý qajettigin aıtýmen keledi. Azamattyq alý úshin qandastarymyzǵa 5 jyl kútý qajet, sondaı-aq oralmandardyń kóship kelý kvotasy da joıylǵan edi. Endi bul kedergiler alynyp tastalmaqshy.  Aǵaıyndar, súıinshi!

 Qazaqstanǵa kelgisi kelmeı turǵan qazaq joq, jibermeı otyrǵan shetel joq. Sheteldegi qandastardyń bári kózderi jáýdirep bir shańyraq astyna toptasqysy, balalaryn azat eldiń aýasymen tynystatqysy, bir nandy bóliskisi keledi. Tek kerek qylmaı otyrǵan bizdiń orystanǵan bılik, eshbir aqylǵa syımaıtyn jaǵdaı. San ǵasyrlar ata-babalarymyzdyń attyń ústinde júrip ashy terimen qyzyl qanymen qorǵaǵan biraz jerler kórshilerdiń qanjyǵasyna ketkenimen, qalǵan Atyraý men Altaıdyń arasy taqııamyzǵa tar kelmeıdi. Osy jerdi saqtap qalsaq, ıgi edi.

   Talaı tar jol, taıǵaq keshken babalar, qıyn-qystaý zamannyń kesirinen álemge tarydaı shashylǵan. О́zim ósken О́zbekstan Respýblıkasy, Navoıı oblysy, Tamdybulaq aýdanyndaǵy synyptasym, Baımurzaev Nurqısa ǵalamtorda maǵan «Qazaq jerin bir kórip, topyraǵynda aýnasam, bir kese sýyn iship, aýasyn jutyp serýendesem, Astanaǵa baryp Báıterekke shyqsam armanym joq edi» sen ol jaqta júrip onyń qadirin bilmeısiń, -deıdi. Solardy neǵurlym tez arada elge shaqyryp almasaq, soǵurlym turyp jatqan eline tastaı batyp, sýdaı sińip ketýi  múmkin. Sondyqtan,  biz kún ótken saıyn emes, saǵat ótken saıyn keshigip jatyrmyz. Shette qalǵan qandastaryń taǵdyry meni qatty alańdatady. Olardyń taǵdyry ne bolmaq?

Jumamurat  Shámshi, tarıh  ǵylymdarynyń  kandıdaty