Qytaıdaǵy "Alashorda aqyny" - Tańjaryq Joldyuly(Derekti fılm)

Tańjaryq Joldyuly(1903-1947) – Qytaıdaǵy qazaq ádebıetiniń negizin qalaýshy. Ol - Shyńjań óńirinde alǵashqy qazaq gazetin shyǵaryp, teatr ashqan, ustazdar jasaqtap, mektep saldyrǵan aǵartýshy. Eń bastysy, Tańjaryq – Álıhan Bókeıhanov bastaǵan «Alashordanyń» Qytaı jerindegi ókili boldy. Bul kúnde aqyn shyǵarmalary kóptep jaryq kórip, ult rýhanııatyna qosqan ulanǵaıyr eńbegi jaıynda tom-tom zertteýler jasalýda. Qalaı desek te, Alash azattyǵy úshin janyn pıda etken Tańjaryq esimi qazaq jurtymen birge jasaı beretindigi sózsiz.

aAsa mártebeli oqyrman! Usynylyp otyrǵan derekti fılm Alash ıdeıasynyń Qytaı aspanynda janǵan juldyzy  ispetti Tańjaryq Joldyulynyń kelte ǵumyrynan syr shertedi.  Sol kezdegi Shyńjańdy bılegen Shyń Shysaı ókimetiniń qazaq zııalylaryn túrmeniń túbinde shiritken jaýyzdyqtary ashyq baıandalady.

Barsańdar Úrimjiniń qalasyna,

Kóziń sal qaltarys, saı-salasyna.

«Umytpa, óle-ólgenshe osyny» dep,

Tapsyryp ket balańnyń balasyna!

-dep ósıet qaldyrǵan aqynnyń bolashaq urpaqqa neni «umytpa» degenin jan tózgisiz azaptaýlar beınelengen fılm arqyly anyq bile alasyzdar...

Aqyn ne úshin Qazaqstanǵa keldi? Ne úshin at basyn keri burdy?

Shyńjań qazaqtaryna neni nasıhattap, neni úıretkisi keldi?

Ahmet Baıtursynuly, Mirjaqyp Dýlatuly, Shákárim Qudaıberdiuly shyǵarmalary Tańjaryq óleńderinen qalaı kórinis tapty?

Aqyn taǵdyry týraly Qabdesh Júmádilov, Nábıjan Muhamethanuly, Shara Tańjaryqqyzy, Turlybek Mameseıit ne deıdi?

Elbasy Nursultan Nazarbaev Tańjaryq taǵylymy jaıynda ne aıtty?

Bul suraqtardyń jaýabyn osy derekti fılmnen taba alasyzdar.

«Tańjaryq Joldyuly» derekti fılminiń rejısseri - osyǵan deıin «Kúltegin», «Ermurat Zeıiphanuly» derekti fılmderin túsirgen belgili telejýrnalıst, maıtalman dýblıajshy Ásemǵazy Qapanuly.

Aqyn taǵdyry týraly  Baýyrjan Omarulynyń «Tańjaryqtyń taǵdyry» atty maqalasynan oqýlaryńyzǵa bolady (http://qamshy.kz/?p=4713).