Qytaıda turatyn bir qazaqtyń jan syry

Kúni keshe jarııalaǵan “Sheteldegi Qazaq jastaryna úndeý”  bizdiń saıtymyzben  qatar, Qytaı qazaqtarynyń saıttarynda  da túrli pikir týǵyzdy. Osyǵan oraı, Qytaıdaǵy bir  qandasymyz  ún  qosqan eken, nazarlaryńyzǵa joldamanyń mátinin  usynyp otyrmyz...

    Men 1968-jyly týyldym . Ol jyldary «Qytaıdaǵy mádenıet zor tóńkerisi» kezeńi bolatyn. Balalyq dáýrimdi asa joqshylyq kezeńde ótkizdim. Alaıda oqýǵa qatty qulshyndymda, mektepti úzdik nátıjemen bitirip,1986 jyly Ile pedagogıkalyq ınstıýtynyń saıasat fakýltetine oqýǵa túsitim. Biraq bul jyldary Qazaqstan elinde 16 jeltoqsan ýaqıǵasy bolǵanyn ol kezde qaıdan bileıin! 1990-jyly oqý bitirip, aýdandyq tolyq orta mektepke saıasattaný páninen sabaq beretin oqytýshy bolyp jumys isteı bastadym. Bir jyldan soń SSSR tarap ketti. Tosyn jańalyq bizdi de eleń etkizdi. Qýanbaǵan Qazaq balasy kemde-kem. «Qoıshy,qaıtemiz!» deýshilerde boldy. Keıbireý kóshýden qoryqty, nege qoryqqanyn kim bilsin! Men qyzýda qyrpýly shaǵym. Qyzmetim bar, jaqsy jalaqym bar. «Ol jaqqa barǵanda ata-anamdy kim baǵady,qandaı kúnder kútip túr?» dep oıladym. Elde ári –sári. Azdaǵan adamdar ketip jatty… 1998-2000 Jyldar aralyǵynda kóshi-qon jandana bastady . Osy kezde ketýshiler shamaly molaıa bastaǵan kez bolatyn. Al ol kezde men Qazaqstandy jamandaýshylar qatarynda boldym. «Ol jaqta shoshqa etin jeı beredi eken, jergilikti Qazaqta Qazaqy rýh joq, barsań ózińdi tonap, janyńdy alady eken!» dedim. Osy aralyqta balaly-shaǵaly boldym. Qudaı bergen bir ul, bir qyzdy ósirip alańsyz jattym. Kúnder ótip jatty.. 2012 Jylǵy London olımpıadasynan keıin men Qazaqstan jaıly shynaıy aqparattardy izdestire bastadym. Olımpıada kezindegi jetistikter meniń oıymdy serpiltti. Qazaqstan eline qonys aýdarýdy oılastyra bastadym. Ulym tolyq orta , Qyzym ortalaý jyldyqta «Qos tildi» mektepte oqıdy. Meniń qasiretim de, ókinshim de 2014 jyly Qyrymǵa Reseı áskerin kirgizgennen keıin bastaldy. Bir jyl buryn ǵana bútin eldiń bólshektenýi óte ońaı eken. Qazaqstan eline tóngen qaýip meni mazalaǵanda men Qazaqstanǵa júregim baılanǵanyn biraq bildim. Basqa qonǵan baq baǵalaǵanda ǵana uzaq turatynyn tanyp jettim. Men kesh qalǵanymdy sezdim. Qatty ókindim. Men: «23 jyl ne bitirip júrdim? Men satqynmyn, men opasyzbyn, men aqshaǵa bola, jaqsy,tynysh turmysqa bola 23 jyldyq ómirimdi ysyrap etken essizdigimdi endi qalaı toltyramyn?» dep arpalystym. Iá, «eshten kesh jaqsy» degenǵoı. Men Qazaqstan elinen shaqyrtýymdy aldyryp,aýdartyp, barlyq qujat jumystarymdy bitirip, qazir vıza ashqyzý jumystarymen júrmin. Qazaqstan elindegi tanysym « Aqshanyń qulaǵyn kórsetseń, azamattyqtyń da qulaǵy kórinedi» degen úmit pen habardy jyltyń etkizdi… Ne bolsada bara kóreıin, Árqashan Alladan tilerim: meniń qateligim men ókinishimdi basqa bir pendege, basqa bir Qazaqqa bere kórme!- dep tilep kelemin…

kultegin