"Telefon, ınternet toqtatylsa", bir-birińdi qaıdan tabasyń qazaq?

"Terrorlyq qaýip týyndaǵan kezde" ǵalamtor men uıaly telefon ýaqytsha sóndirilýi múmkin. Bul týraly Qazaqstan Respýblıkasy Ishki ister mınıstri Qalmuhanbet Qasymov aıtty.

Onyń sózine qaraǵanda terrorlyq qaýip týyndaǵan kezde barlyq baılanys quraldaryn «jaýyp» tastaý kerek. Osy arqyly ekstremıstik áreketterge tosqaýyl qoıýǵa bolady-mys.

Iаǵnı, Siz bir sátte áke-shesheńizben, bala-shaǵańyzben, týǵan-týysyńyzben, dos-jarandaryńyzben baılanysa almaı qalasyz. Tipti, Qalmuhanbet myrza buıryq berip, baılanys quraldaryn qaıta iske qosqansha bir-birlerińizdi izdep tentirep ketýlerińiz ábden múmkin.

Biz bul máseleni "qaýip etkennen" erte aıtqanbyz. «Alda-jalda... Alash qaıda jınalady?» dep bar qazaqqa jar salǵanbyz(http://qamshy.kz/?p=6732).

Alda-jalda... Alash qaıda jınalady?

HHI ǵasyr – san túrli tehnıka men myń san aqparat ǵasyry. Sóz ustaıtyn, el bastaıtyn adamnyń bári telekommýnıkasııa men kompıýterge táýeldi. Bul úrdis adamdar arasyndaǵy qarym-qatynasty basy bútin basqa arnaǵa burdy. Iаǵnı sizdiń hat-habar alysyp, hal-jaǵdaı uǵysý «qyzmetińiz» túgeldeı tehnıkaǵa júktelgen.

Keshe ǵana uıaly baılanys arqyly taraǵan «bankter bankroty» týraly qaýeset qanshalyqty deńgeıge jetkendigi kóz aldymyzda. Aıtaıyn degenimiz bul emes. Táýelsizdik pen memlekettik qaýipsizdikti saqtaý – árbir azamattyń paryzy. Asty-ústi en baılyqqa tolǵan qazaq jerine kóz tigýshiler qaı-qashanda saqadaı saı otyr. Endeshe, kez kelgen ýaqytta tóner qater-qaýipke qazaq balasy daıyn ba?

Túgel bıler jınalyp, bas qosatyn «kúltóbemiz» qaısy? Alty Alashtyń basyn qosatyn týy jelbiregen tuǵyrymyz qaı jer?

Uıal baılanysyńyz aıaq asty úzildi, ınternetińiz bir sátte kózden ǵaıyp boldy delik. Birińdi biriń qaıdan tabasyń qazaq? Saıda sanyń, qumda iziń qalmaı sandalyp qalasyń ba?

Bul joq jerden jaý shaqyrý emes. Basymyz esen, baýyrymyz bútin zamanda ishki-syrtqy jaýlardan qorǵanýǵa árqashan daıyn bolsaq degen oı. Bir ǵana Almatynyń ózinde Respýblıka saraıy, Jańa alań, Kóne alań, Sary arqa teatry… Qoıshy, áıteýir on qazaqty topstarymaýǵa barlyq jaǵdaı jasalǵan.

Bir-birin aıtqyzbaı uǵatyn ulttyq ustanym, ulttyq ıdeıa, ulttyq murat atymen joq bizde. Táýelsizdiktiń 23 jyly mundaı qasıetti uǵymdarǵa muryn shúıire qarady.

Ataly sóz aıtyńdarshy Alash balasy! Eldiń táýelsizdigine, memlekettiń qaýipsizdigine «syzat túser» syn saǵat týsa bireý-bireýdi shaqyrmaı-aq qaıda bas túıistiremiz? Qaı qalanyń qaı buryshy bizdiń at baılar orynymyz bolady? (Árıne, Qudaı saqtasyn jıylǵannan!!!)