Muhtar Shahanov. Ýkraına sabaǵy: Qazaqstan Reseıden úzildi-kesildi bas tartýy tıis

Reseı Ýkraınaǵa qarsy basqynshylyq saıasat ustanyp otyr. Ýkraına osy ýaqytqa deıin halyqaralyq deńgeıde moıyndalǵan, shekarasy bekitilgen táýelsiz memleket. Qyrymdy Ýkraınadan bólip qaraýǵa bolmaıdy. Qazirgi Ýkraınadaǵy jaǵdaı olardyń ishki sharýasy. Reseıdiń «biz orystildilerdiń quqyǵyn qorǵaımyz» dep Qyrymǵa óz saıasatyn júrgizýdi kókseýi eshqandaı halyqaralyq normaǵa syımaıdy. Eger Reseı ózge eldermen de osyndaı saıasat ustanatyn bolsa, onda negizinen orys tilinde sóıleıtin Qazaqstannyń soltústik oblystary ózderin Reseıdiń bir bólshegi retinde sezineri anyq. Mundaı jaǵdaıda olar eshqashan Qazaqstannyń tileýin tilemeıdi. Eger Ýkraına Qyrymnan aıyrylatyn bolsa, onda mundaı qaýip bizdiń de basymyzǵa tónip turǵandyǵyn jasyrýǵa bolmaıdy. Sondyqtan erteńgi kúni óz basymyzǵa keletin jaıttan búgin arylý úshin Reseıdiń shovınıstik shabýylyna jol bermegen jón. Onyń ústine álemdik deńgeıde óz yqpalyn, óz saıasatyn júrgizip otyrǵan Úlken Segizdik kózqarasymen de sanasýǵa týra keledi. Jáne biz olardyń kózqarasyn aqymaqtyq deı almaımyz. V.Pýtın Jırınovskııdiń aýzymen Qazaqstan jáne Ortalyq Azııa respýblıkalaryn Reseıdiń bodany etkisi keletinin anyq sezdirdi de.

Pýtınniń dollar aýmaǵynan shyǵamyz deýi de oń sheshim emes. Qazirgideı almaǵaıyp zamanda jańa valıýtany aınalymǵa engizý ekonomıkalyq jáne saıası qatelikterge uryndyrady. Munyń sońy – jappaı daǵdarys. Daǵdarys sońy – arab elderindegideı tóńkeriske alyp barýy múmkin. Sondyqtan Reseıdiń búgingi solaqaı saıasatyna jol berýge bolmaıdy.

Qazaqstan Reseıdiń jańa Keńestik Odaq qurý nıetimen uıymdastyrǵan Kedendik odaǵynan, alda qol qoıylýy kútilip otyrǵan Eýrazııalyq ekonomıkalyq keńistiginen úzildi-kesildi bas tartýǵa tıis dep esepteımiz!

«Halyq ókilderi quryltaıy» qurǵan

Qazaq Ulttyq Keńesiniń atynan                                     Muhtar ShAHANOV