Qazaqstanda YouTube Premium paıda boldy

   YouTube-tiń premium-akkaýntyna qol jetkizgender beınelerdi jarnamasyz jáne fondyq rejımde kóre alady, ınternetke qosylmaı kórý úshin beınelerdi saqtaı alady jáne basqa da birqatar múmkindikterge ıe bolady. 

    Qazaqstandyqtarǵa YouTube Premium jazylymynyń birneshe nusqasy usynyldy: jeke, otbasylyq jáne stýdentterge arnalǵan. Buqaralyq aqparat quraldarynyń habarlaýynsha, birqatar elderde jeke jazylymnyń baǵasy aıyna $11,99 (shamamen 5400 teńge) quraıdy. Bul jańalyq týraly sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın de habarlady.

    Ol ótken jyldyń naýryz aıynda Kremnıı alqabyna jumys sapary barysynda men Youtube ónimderin basqarý jónindegi vıse-prezıdent Adam Smıtpen kezdesip, servıstiń Qazaqstanda iske qosylýyn talqylaǵanyn aıtady.

- Al búgin men sizdermen keremet jańalyqpen bóliskim keledi. Qoldanýshylar men  kontent jasaıtyndarǵa jańa múmkindikter ashatyn YouTube Premium endi Qazaqstanda. Bul oqıǵa eldiń sıfrlyq ınfraqurylymyn damytý men ony jahandyq jelige biriktirýde jasaǵan eleýli qadam.

Basqa qyzmettermen qatar YouTube Premium-di qoldaný beıne men mýzykalyq mazmunǵa jarnamasyz sheksiz qol jetimdilikti, beıne materıaldardy oflaın rejımde kórý úshin ony júkteý múmkindigin jáne basqa qosymshalardy qatar qoldaný kezinde ony fondyq rejımde de tyńdaý múmkindigin qamtamasyz etedi, – deıdi mınıstr.

    Baǵdat Mýsın sondaı-aq qazir sıfrlyq ekonomıkany damytý men Qazaqstandaǵy jergilikti kontent-jasaýshylardy qoldaý múmkindikteri kún tártibinde ekenin atap ótedi.