Almatyda halyq narazylyq bildirdi

Azattyq tilshisiniń habarlaýynsha, 15 aqpan kúni saǵat kúndizgi 12:00 shamasynda Dostyq jáne Abaı kósheleriniń qıylysyndaǵy Abaı eskertkishi mańyna ondaǵan narazy azamat jınalǵan.

Olar Abaı eskertkishi temir týrnıkettermen qorshalǵandyqtan, narazylyq jıynyn qorshaý syrtynda, Dostyq kóshesiniń trotýarynda ótkizip jatyr. О́zin Rozagúl Telebaeva dep tanystyrǵan jalǵyzilikti ana jınalǵandardyń eshqandaı saıası uıymǵa jatpaıtynyn, jeke azamattar ekenin aıtyp, talaptary "problemalyq nesıelerin joıý" ekenin málimdegen. Túski saǵat 13:00 shamasynda narazylarǵa azamattyq belsendiler Qanaǵat Takeeva, Jasaral Qýanyshálın, Dılnar Insenova kelip, ózderiniń Almaty qalasynyń ákimi Ahmetjan Esimovpen jolyqqandaryn aıtqan. Jasaral Qýanyshálınniń aıtýynsha, Esimovke olar "problemalyq nesıelerdi joıý, devalvasııadan keıingi qymbatshylyqty boldyrmaý jáne muqtaj azamattarǵa Almatydan 10 sotyqtan jer berý" týraly úsh talap qoıǵan. Almaty qalasynyń ákimi problemalyq nesıelerge qatysty úkimet sheshimin kútip otyrǵanyn, ákimdiktiń qymbatshylyqty boldyrmaýǵa tyrysatynyn, Almatyda bos jer joq ekenin aıtqan. Belsendiler "Esimovke kelesi aptanyń sársenbisinde qaıta kezdesýge usynys jasaǵandaryn, ákim oǵan "oılanaıyn" dep jaýap bergenin" aıtty. Narazylar budan soń qorshaýdan Abaı eskertkishine qaraı ótpek bolǵan. Alaıda olardy polısııa jibermegen. On shaqty adam "Shal, ket!" dep aıǵaılaǵan. Azattyq tilshisiniń aıtýynsha, "kóshede shylym shekkeni úshin" polısııa bir adamdy ustaǵan. 11 aqpan kúni Qazaqstan Ulttyq banki teńgeniń AQSh dollaryna shaqqandaǵy burynǵy baǵamyn ustap turýdan bas tartyp, dollar baǵamyn 185 teńge dep belgilegen edi. Erteńinde Devalvasııaǵa narazylar keshe de Almatyda qalalyq ákimdikke, Ulttyq bankke baryp, qarsylyqtaryn bildirgen. 13 aqpan kúni narazylar qaladaǵy bazarlarda taýar baǵalarynyń qymbattap ketkenin aıtyp, Esimovten baǵanyń qymbattaýyna baqylaý jasaýdy talap etken edi. Azattyq.org "Qamshy" silteıdi