13 jyl «kúttirip», 6,5 kg bolyp týylǵan balýan

     Sporttyń joldan qosyla ketýge kelmeıtin  bir salasy – kúres. Bap pen baqtan basqa, atanyń qany, ananyń súti arqyly daryǵan aqyl-sana, iri deneli bolýdyń  mańyzy joǵary. Osy salada jaýyryny jerge tımeı júrgen bir balýanymyz - Qısa Qabıuly. Qısa  atajurtqa kórshi Qytaı elinen kelgen qandasymyz. Týylǵanda 6,5 kg bolyp el-jurtty eleń etkizgen. Ol 1988 jyl bolatyn.Oǵan deıin ata-anasy 13 jyl boıy bir perzentke zar bolyp kelgen. Sóıtip, jaryq dúnıege kele salysymen nazarǵa ilikken Qısany bapkerler bala kúninde ata-anasynan qolqalap alady, Qytaıdyń qıyr shetindegi Lanjý qalasyna oqýǵa jiberedi. Osylaı 13 jasqa tolmastan beldesýdiń qyr-syryn meńgerýge kirisken  Qısa 2003 jyldan beri boz kilemniń ústinde. Alǵashqy jeńistiń asqaq sezimin aýyldan bastaǵan balýan  4 jylda bir ret ótetin Qytaıdyń ishki birinshiliginde 96 kg salmaqta top jardy. Qytaıdyń ulttyq quramasynyń qatarynda 3 jyl óner kórsetti. Shyńjań óńirinde oǵan deıin eshkim osy márege jetpegen eken. Osylaı qarsylastaryn qoǵadaı japyryp júrgende Almatyda ótken kezekti jarysta qarsylasynyń oqys qımylynan aıaǵynyń  sińiri úzilip, toǵyz aı  baldaqqa súıenip qalady. Sóıtip, buryndary ózi oıqastap júrgen sharshy alańdy syrttaı tamashalaýǵa týra keledi.

Aqyry densaýlyǵy qalpyna kelgen soń elge kelýdi oılaıdy. Qazaq eliniń gúrzi judyryqty oǵlany Qanat Islamnyń  shaqyrýy qamshy bolyp, ata-babasy kúl tókken kıeli mekenge tartyp beredi. Búginde Almaty oblysy balýandarynyń sapynda erkin kúres pen qazaqsha kúresten óner kórsetip júr. Salmaǵy 140 kg, boıy 190 sm. Áńgime barysynda Qısa kásipker aǵalary  Baýyrjan Ospanov pen Arman Ońǵarbektiń qarjylyq jaǵynan kómek qolyn sozǵanyn aıtty. Erkin kúresten bapkeri Málik Nádirbekuly, qazaqsha kúresten Aıdyn Smaǵulovtan tálim alady.

Qazaq eline kelgeli de Qısa  jeńisten quralaqan emes, kóptegen jarystarda top jaryp júr. Aldaǵy ýaqytta Atajurtyna aq úmitin úkilep kelgen balýannyń basty maqsaty qazaqtyń kók týyn jelbiretý. Qazirge naqty josparlarynyń qatarynda tórtkil dúnıeniń kóz tigip otyrǵan Rıo-de-Janeıro olıpıadasy bar. «Meniń endigi muratym - qudaıdyń bergen kúsh-qýatyn týǵan ultymnyń, qazaq memleketiniń jolynda jumsaý!»,- deıdi balýan.