IIM: Mektepterge shabýyl jasaý týraly habarlamalarǵa sheteldikterdiń qatysy bar

Terrorızm aktisi týraly kórineý jalǵan habarlaý faktileri boıynsha sotqa deıingi tergeý bastaldy. Barlyq qajetti tergeý áreketteri júrgizilýde.

«Qazirgi ýaqytta Almaty, Aqtóbe, Atyraý jáne Pavlodar qalalarynda taralǵan habarlamalarǵa TMD elderi azamattarynyń qatysy bar ekeni anyqtaldy. Sheteldik áriptestermen olardyń qylmystyq áreketterin áshkereleý boıynsha tıisti is-sharalar júrgizilip jatyr. Alaıda tergeý múddesine baılanysty biz ázirge bul faktiler boıynsha tolyq túsinikteme bere almaımyz», dedi QR IIM ımıdjdik jumys jáne ishki kommýnıkasııalar departamentiniń bastyǵy Albına Mahambetova.

Sondaı-aq Qaraǵandy jáne Qostanaı qalalarynda shabýyl jasaý qaýpi bar habarlamalardan keıin kámeletke tolmaǵandardyń Telegram-arnalaryn ashqany anyqtaldy. Olar buryn taratylǵan habarlamalardyń mátinin kóshirip, oqý oryndarynyń fotosýretterin ornalastyryp, óz mektepteriniń chattaryna jalǵan aqparat joldaǵan.

«Qazirgi ýaqytta Qaraǵandy qalasy №15 orta mektebiniń jetinshi synyp oqýshysy jáne Qostanaıdaǵy №3 mektep-gımnazııasynyń tórtinshi synyp oqýshysy anyqtaldy. Olardyń qylmystyq jaýapkershilik jasyna jetpegeni eskerilip, ata-analary bala tárbıesine kóńil bólmegenderi úshin ákimshilik jaýapqa tartyldy», deıdi resmı ókil. 

Sondaı-aq sot sheshimi boıynsha olar jedel qyzmetterdi jalǵan shaqyrtýǵa jáne bilim berý obektilerin tekserýge baılanysty memleketke keltirilgen zalaldy óteıtin bolady. Shyǵyn kólemi eki mıllıon teńgege deıin jetýi múmkin.

Terrorızm aktisine daıyndyq týraly kórineý jalǵan habarlama úshin 5 myń AEK mólsherinde, ıaǵnı 18 mln teńgeden astam aıyppul ne bolmasa 5 jylǵa bas bostandyǵynan aıyrý nemese shekteý jazasy qarastyrylatynyn eske salamyz.