Oblystyń daryndy oqýshylary óz jetistikterin tanystyrdy

Abaı oblysynyń ákimi Nurlan Uranhaev daryndy balalarmen kezdesý ótkizdi. Jıynǵa 50-den astam talantty balalar qatysyp, árqaısysyna 100 myń teńgege sertıfıkattar tabystaldy.

Bıyl oblys ustazdarynyń júıeli jumysynyń arqasynda óńir oqýshylary halyqaralyq, respýblıkalyq zııatkerlik olımpıadalar men shyǵarmashylyq baıqaýlardyń, sporttyq saıystardyń jeńimpazy atandy.

«О́ńirdiń damý strategııasy aıasynda ǵylymdy, IT sektoryn, bilim men mádenıetti nyǵaıtýǵa baǵyttalǵan eleýli jumystar atqarylyp jatyr. Biz sizderge qoldaý kórsetýge daıynbyz, sondyqtan bolashaqta senderge arnap Oqýshylar saraıyn, Kongress-holl, Muz saraıy, zamanaýı mektepter salynady. Byltyr, osyndaı kezdesý barysynda, men ózderińdeı daryndy balalarǵa, arnaıy syıaqy taǵaıyndaý týraly tapsyrma berdim. Balalardy yntalandyrý úshin bul jumystar jalǵasyn tabady. Mundaı bastamalar árbir balanyń áleýetin ashýǵa septigin tıgizetinine senimdimiz», – dedi Nurlan Uranhaev.

Is-shara dóńgelek ústel formatynda ótip, jastar erkin pikir almasýǵa múmkindik aldy. Balalar aımaq basshysyna óz oılaryn, usynystaryn jetkizip, óz ónerlerin kórsetti. Olardyń qatarynda respýblıkalyq mánerlep oqý saıysynyń qatysýshylary, halyqaralyq olımpıadalardyń, shyǵarmashylyq jáne robototehnıka baıqaýlarynyń jeńimpazdary bar.

Máselen, XI Halyqaralyq «Smart Sarbaz» robototehnıka baıqaýynyń jeńimpazy Oljas Samarhan Abaı oblysynda IT salasynyń qarqyndy damyp kele jatqanyn erekshe atap ótti. Ol sıfrlyq jobalardy júzege asyrý úshin arnaıy alańdar ǵana emes, jas daryndardyń óz ónerlerin kórsetetin ortalyq qurý týraly bastama kóterdi.

«Bizdiń oblysymyz jas bolsa da IT salasynda halyqaralyq, tipti álemdik týrnırlerde aıtarlyqtaı jetistikterge jetip júr. Ásirese, kóptegen mektep oqýshylarynyń osy salaǵa degen qyzyǵýshylyǵyn eskersek, ortalyqtyń qurylýy bizge aıtarlyqtaı kómek bolmaq. Bolashaqta oblysymyz elimizdiń «sılıkon alqabyna» aınalatynyna senimdimin», - dedi Oljas Samarhan.

Anyqtama úshin: 2023 jyly oblys oqýshylary zııatkerlik saıysta 78 medal jeńip aldy. Onyń 12-si altyn, 21-i kúmis, 45-i qola. Halyqaralyq deńgeıdegi jeńimpazdar – 20 oqýshy, respýblıkalyq deńgeıde – 58 oqýshy.