Nazarbaev jete almaǵan 2030...

1997 jyly prezıdent bop turǵan Nursultan Nazarbaev óziniń Qazaqstan halqyna arnalǵan joldaýynda "Qazaqstan-2030" strategııasyn jarııalaǵan.

Ultty uıyǵan birlikke, eldi buryn-sońdy bolmaǵan ádildikke, halyqty ál-aýqaty tasyǵan baılyqqa jetkizemiz dep sol zamanda jarııaǵa jar saldy. Saılaýdy ádil ótkizý, BAQ-qa erkindik berý, áıeldiń rólin kúsheıtý degen sózder bolǵan onda.  

Odan beri talaı urpaq aýysty, álgi ýádeniń biri de jaqyndaǵan joq. Esesine elbasy qalpynda Nurekeńniń ózi jete almaǵan 2030 jylǵa búgingi qazaq Toqaevpen birge taıap qaldy.

Qazaqstan bıliginiń táýelsizdik alǵaly beri aınalysyp kele jatqan isi – alystaǵy jyldarǵa arnap jospar qurý. Áı, oǵan deıin óziń barsyń ba, joqsyń ba – oılanbaıdy.

Ulttyq ekonomıka mınıstrligi Qonaev qalasynyń mańaıyn damytýdyń 2028 jylǵa arnalǵan keshendi josparyn jarııalaı salady. Kólik mınıstri Astanadaǵy atyshýly LRT jobasyna 2025 jylǵa deıin jylyna 150 mlrd teńgege deıin suraımyz deıdi. Aqsha tappasaq, tipti Ulttyq qordan alamyz deıdi.

10 jyldan beri myjyp kele jatqan, jemqorlyqpen ataǵy álemge taraǵan, ne toqtamaıtyn, ne aıaqtalyp bitpeıtin joba.

Tek Astana osy qalpynda tura berse, halqy qazirgi qarqynymen kóbeıe berse, árıne, LRT kerek joba. Biraq erteń ne bolaryn bir Qudaı biledi. "Bizden keıin kúl bolmasa búl bolsyn" degen qurylysqa uqsap tur. Aýa-raıy jaısyz, aýyz sýy jetpeı jatqan, qatynaýǵa qıyndaý aıdaladaǵy Astana. Bıliktiń zorlyǵymen, búginniń saıasatymen ǵana astana bop turǵan shyǵar? 

Nazarbaevtyń ózin qaǵyp tastaǵan Qańtar oqıǵasy sııaqty kez-kelgen oqys ózgeris bola qalsa she?

Bılik ázirge ózinen keıin qazaqta ómir bolmaıtyndaı oılaıdy. Anyǵy, Qazaqstanda kelimdi-ketimdi bireý bolsa, ol – bılik. Qazaq pen Qazaqstandy mekendeıtin halyq bul jerde qala beredi.