Gallup testin tapsyrǵan soń ne isteımin? Danııar Jigitbek keńesteri

Gallup – adam boıyndaǵy 34 talantty anyqtaýǵa arnalǵan eń tıimdi testterdiń biri. Testti 1999 jyly amerıkalyq psıholog Donald Klıfton qoldanysqa engizgen. Qazir kópshilik Gallup dep ataǵanymen testtiń resmı ataýy – CliftonStrengths34. Test onlaın formatta ótedi, quny – 50 AQSh dollary. Suraqtarǵa 20 sekýnd ishinde jaýap berý kerek. Jaýaptarǵa qaraı shamamen 25 betten turatyn test nátıjesi beriledi.

Gallup nátıjelerine taldaý jasap júrgen bloger, tehnıka ǵylymdarynyń magıstri Danııar Jigitbek adamdardyń ózin tanýǵa degen qulshynysy testtiń keńirek tanylýyna sebep bolǵanyn aıtady.

«Gallup testiniń basqalardan ereksheligi – adamdy jan-jaqty tanýǵa múmkindik berýinde. Yqpaldy, tanymal adamdardyń halyq arasynda keńinen nasıhattaýy da Gallup-tyń tanymal bolýyna sebep boldy dep oılaımyn. Test nátıjesi adamdy 34 sózben sıpattap beredi. Ár talant túrli deńgeıde kórinis tabatyndyqtan test nátıjesinde talanttar rettik sanmen kórsetilgen», – deıdi Danııar Jigitbek.  

Test nátıjesi medısınalyq analız sekildi

Test nátıjesi medısınalyq analız sekildi. Mysaly, medısınalyq analız qorytyndysyn azdap túsinemiz, biraq tolyq taldaý jasaı almaımyz. Holesterınniń normadan tómen ekenin bilsek, gemoglabınniń joǵary ekenine mán bermeýimiz múmkin. Sondyqtan Gallup testiniń nátıjesin taldaý kezinde tájirıbeli mamanǵa júgingen durys. Mamannyń tájirıbeli bolýy qansha test nátıjesine taldaý jasaǵanyna baılanysty. Sondyqtan «Neshe adamnyń Gallup-yna taldaý jasadyńyz?» dep ashyq suraý kerek. Sebebi kemi 100 ret taldaý jasaǵan adam sizdiń suraqtaryńyzǵa naqty jaýap bere alady.

Test nátıjesin alǵan soń birden mamanǵa júgirý durys emes

Men test tapsyrǵan soń aldymen óz betimshe taldaý jasadym. Nátıjemen tanysyp shyqqan soń kóptegen suraq paıda boldy. Jaýap taba almaǵandyqtan mamannyń kómegine júgindim. Ol meniń barlyq saýalyma naqty-naqty jaýap berdi. Menińshe, test nátıjesin alǵan soń birden mamanǵa júgirý durys emes. Eń aldymen ár adam nátıjemen tanysyp, óz betinshe taldaýy kerek. Sol kezde ǵana suraqtar paıda bolady. Suraq qoıyp, mamanmen birge taldaý áldeqaıda tıimdi. Az ýaqyttyń ishinde ózińdi tanyp-bilý múmkin emes. Kókeıdegi sansyz suraqqa jaýap taýyp, júregińizge tynyshtyq ornaǵanǵa deıin testke taldaý jasaıtyn mamannyń mazasyn alýdan uıalmańyz. Sondaı-aq Gallup tapsyrǵan basqa dostaryńyzben kezdesip, olardyń nátıjelerin kórip pikir almasý da paıdaǵa asyp jatady.

Gallup nátıjesin ózgertýge bola ma?

Gallup ınstıtýtynyń fılosofııasy: «Álsiz talantpen álek bolǵansha myqty qabiletińdi damytý áldeqaıda tıimdi». Test nátıjesinde talanttaryńyz ret-retimen qoıylǵan. Al ony ári qaraı qalaı damytýǵa bolady? Myqty qabiletińizdi qoldana alatyn ispen shuǵyldaný arqyly damyta alasyz. Mysaly, «Learner» (Bilim alý) talantyn paıdaly kýrstarǵa qatysyp, kitap oqyp, bilim alýdy jalǵastyrý arqyly kúsheıtýge bolady. Al álsiz talantty qajet etetin isterden aýlaq júrý kerek. Biraq keıde jumysqa bizdiń álsiz qabiletimiz qajet bolyp jatady. Mundaı kezde myqty tusyńyz arqyly kemshilikti jabýǵa bolady.

Talanttar qatty jáne jumsaq dep bólinedi. Qatty talantty ózgertý qıyn. О́ıtkeni genmen keledi nemese jastyq shaǵynda neırondyq baılanystar bekip, ózgerýi qıyn talant retinde qalyptasady. Adamnyń tabıǵatyna aınalǵan talantty ózgertý qıynnyń qıyny. Al «Empathy» (Empatııa), «Intellection» (Intelekt) sekildi talanttardy kúsheıtý asa qıyn emes. Tyrysyp, sál kúsh salsań jetkilikti. Analız kórsetkishteri de ózgerýi múmkin ǵoı. Qan toby ózgermese de gemoglabın, temirdiń deńgeıi ózgeredi. Sol sekildi ózgermeıtin dúnıe joq. Tek adam jumys isteýdi, ózin jetildirýdi toqtatpaýy kerek.