Bolat Nazarbaevqa tıesili jerler memleketke qaıtaryldy

Bolat Nazarbaevtyń enshiles kompanııalaryna tıesili jerler memleketke qaıtaryldy. Bul týraly "Amanat" partııasy janyndaǵy Memlekettik basqarýdy damytý jáne sybaılas jemqorlyqqa qarsy is-qımyl jónindegi respýblıkalyq qoǵamdyq keńestiń tóraǵasy Erlan Saıyrov habarlady.

Resmı málimet boıynsha, Bolat Nazarbaevtyń enshiles kompanııalaryna tıesili Mańǵystaý oblysynda 239 myń gektar, Jambyl oblysynda 60 myń gektar jer memleket menshigine qaıtarylǵan. 

Onyń aıtýynsha, bas prokýratýra Bolat Nazarbaeavqa tıesili Astana, Almaty, Talǵar qalalary, Qaskeleń eldi mekeni, Túrkistan oblysynyń eń tıimdi jerlerinde ornalasqan 244 gektar bolatyn 59 jer telimin anyqtaǵan. Bul jerler bıznes-ortalyqtary, kottedj qalashyqtaryn salýǵa arnalǵan.

"Bas prokýratýra, jer resýrstary komıteti anyqtaǵandaı, jer telimderiniń basym kópshiligi zańsyz rásimdelgen. Qazir bas prokýratýra osy jer telimderin memleket menshigine qaıtarý jumystaryn júrgizip jatyr. Biz bul máseleni qoǵamdyq baqylaýda ustaımyz",  dedi Erlan Saıyrov. 

Budan bólek, Erlan Saıyrov qoǵamdyq keńeske azamattardan Qulybaev, Klebanov, ArselorMıttal, Halyq banki, Jýsan bankine baılanysty materıaldar túsip jatqanyn aıtty. Atalǵan faktiler tıisti organdarǵa tekserý úshin jiberilmek.