"Qol qýsyryp qarap otyrmaıdy". Qytaı AQSh ókiliniń Taıvanǵa saparyn aıyptady

Qytaı AQSh ókilder palatasynyń spıkeri Nensı Pelosıdiń Taıvanǵa saparyn halyqaralyq quqyqty buzyp, Taıvan buǵazyndaǵy beıbit ómirge qaýip tóndiredi dep aıyptady. Bul týraly Qytaı memlekettik keńes múshesi, Syrtqy ister mınıstri Van ı málim etti.

Sınhýa agentiginiń jazýynsha, qytaı sheneýnigi Nensı Pelosıdiń saparyn saldary jıirkenishti bolarlyq saıası avantıýra dep atap, AQSh osy arqyly separatızmdi qoldap, qytaı ultyna qarsy arandatý jasap otyr dep sanaıtynyn jetkizgen.

"Nensı Pelosıdiń sapary AQSh-tyń "Úndi-Tynyq muhıty strategııasynyń zııandy ári qaıshylyqqa toly qyryn tanytyp, Vashıngton halyqaralyq erejelerge qatysty ekijúzdi, qosstandart saıasat ustanatynyn kórsetti. Onyń bul áreketi AQSh saıasatyn, dıplomatııasyn, bedelin bankrotqa ushyratyp, Vashıngton Taıvan buǵasyndaǵy beıbit ómirdiń shyrqyn buzýshy, aımaqtyq turaqtylyqty qurtýshy ekenin dáleldedi" deıdi Van ı.

Qytaı sheneýnigi eger AQSh áreketin toıtarmasa, onda egemendik pen aýmaqtyq tutastyq týraly qaǵıdattar jáı ǵana qaǵaz qıyndysy bolyp qalyp, kóptegen separatıstik ári ekstremıstik kúshter jandana túsýi múmkin ekenin aıtady.

"Bul aımaqtaǵy beıbitshilikke orasan zalalyn tıgizedi" deıdi ol.

Van I Qytaı eldiń negizgi múddeleri men ulttyq jańǵyrý prosesine qaýip tónýine jol bermeıtinin atap ótip, AQSh Taıvan oqıǵasyn óziniń egoıstik josparlaryna paıdalanýǵa tyrysyp jatqanyna qol qýsyryp qarap otyrmaıtynyn málim etti.