Foto: Vıdeodan skrınshot
Qańtar oqıǵasynan keıin qamaýda azaptaýǵa usharyp qolhatpen úıge shyǵarylǵan 10 jigit quzyrly organdarǵa úndeý joldady. Olar "jappaı tártipsizdikke qatysty" (Qylmystyq kodekstiń 272-baby 2-bólimi) degen aıyppen qozǵalǵan qylmystyq isti qysqartyp, ózderin aqtaýdy talap etedi. Bul týraly "Tamshy" áleýmettik qaıyr qory jetekshileriniń biri, jýrnalıst Baqytjan Qosbarmaqov facebook paraqshasynda málim etti.
Erbol Shahanov, Baqyt Ystybaev, Saıat Ádilbekuly, Darhan Dúsıbaev, Dáýlet Japparbekov, Azat Talǵatbek, Nurtas Qaranaev, Marat Ihsanıev, Aqyljan Qısymbaev, Qosaı Mahanbaev eshqandaı da terrorıst emes ekenin, eshteńeni shaǵyp, qıratpaǵanyn, jaralanǵan adamdarǵa kómekteskenin, ózderi oqqa ushyp, túrmede azaptalǵanyn aıtady. Kóbi múgedek bolyp qalǵan. Biri alańǵa beıbit túrde oıymyzdy aıtýǵa shyqtyq, endi biri alańǵa kezdeısoq tap boldyq dep otyr.
"Qańtar qyrǵynyna qatysty Almatydaǵy SI-18 túrmesinde otyryp, qazir qolhatpen úıge shyqqan bul 10 jigittiń bári de – jaraly. Biriniń aıaǵyna, biriniń ishine, biriniń qýyǵyna oq tıgen. Olardyń bárin 8-9 qańtarda bolnısada jatqan jerinen alyp ketip, túrmege aparyp, birneshe kún azaptap, qatygezdikpen qınaǵan. Aıaq-qolyn syndyrǵan, kerip qoıyp, "grýsha" qylyp uryp-soqqan. Ústine qaınaǵan sý quıyp, terisi sydyrylyp kúıip qalǵandar da, kózi soqyr bolyp qalǵandar da bar. Bul jigitterdiń bárine QR Qylmystyq kodekstiń 272-baby, 2-bólimi – "jappaı tártipsizdikke qatysty" degen kúdikpen qylmystyq is qozǵalǵan. Bul – óte aýyr statıa. Eger osy aıyppen sottalsa, 3 jyldan 8 jylǵa deıin bas bostandyǵynan aıyrylady. Qańtarshy jigitter ózderiniń esh kinási joq ekenin, tek beıbit mıtıngige shyqqanyn aıtady. Keıbiri tipti alańǵa da barmaǵan, kóshede, dúkenge bara jatqanda jazataıym oq tıgen. Olar ózderiniń eshqandaı kinási joq ekenin aıtyp, halyqqa úndeý joldady jáne ókimetten qylmystyq isti toqtatyp, qysqartýdy, ózderin aqtaýdy talap etti" deıdi jýrnalıst.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir