• USD 468.56

  • EUR 497.56

  • RUB 7.3

  • CNY 67.18

29 Naýryz, 02:37:42
Almaty
+35°

18 qańtar kúni kóptegen aqparat quraldary qańtar oqıǵasyndaǵy tártipsizdikter kezinde qyzmettik ıt urlanyp, urlaǵan adam qolǵa túskeni týraly aqparatty jarysa jarııalady. Atalǵan is boıynsha kúdikti retinde qamaýda otyrǵan Ańsaǵan Almuhanovtyń anasy Anar Orazalınova oqıǵa barysy múlde basqasha bolǵanyn, uly ıtti qorǵaý maqsatynda ózimen birge alańnan alyp ketkenin, balasyn eshkim ustamaǵanyn, ol polısııa bólimine túsinikteme jazý úshin óz aıaǵymen barǵanyn aıtady.

Anar Orazalınova Almaty oblysy Qarasaý aýdany Rahat-1 eldimekeniniń turǵyny. Uly Ańsaǵan Almuhanovqa qylmystyq kodekstiń 380-baby 3-bóligi (Bılik ókiline qatysty kúsh qoldaný) boıynsha aıyp taǵylyp, 2 aıǵa qamaýǵa alynǵan. Oǵan 7 jyldan 12 jylǵa deıingi merzimge bas bostandyǵynan aırylý qaýpi tónip tur.

Sherli ana búgin Almatydaǵy LA-155/18 mekemesinde jatqan ulyn ekinshi márte kórip, kóz jasyn kól qylyp shyqty. Aıtýynsha, ulyn arashalaýdyń jalǵyz amaly – onyń ıtti qutqarmaq bolǵanyn kórgen adamdardy tabý. Olaı bolmaǵan jaǵdaıda Almaty qalasy polısııa departamenti taratqandaı, balasy «Naıts esimdi qyzmettik ovcharkany urlaǵan» bolyp shyǵady. «polısııa taratqan aqparat jalǵan» degen ol oqıǵanyń qalaı órbigenine baılanysty óziniń nusqasyn aıtyp berdi.

 

– Balam taksıletip qaıtý úshin 5 qańtar kúni úıden shyǵyp ketken. Momyshuly kóshesimen tómen qaraı túsip kele jatqanynda aldynan adamdar toby shyǵyp, kólikterdi toqtata bastapty. Olar «sender de osy eldiń azamaty emessińder me, beıbit mıtıngke shyǵyp, halyq jaǵdaıy qıyndap ketkenin aıtaıyq. Árkim óz basyn ala qashsa, halyq jaǵdaıyn jetkizedi» degen sııaqty sózder aıtyp, balamdy ózderine qosylýǵa shaqyrady. Keıbireýleri «ana jaqta kóliginen túspegen adamdarǵa tas laqtyrǵanyn kórgenin» dep aıtypty. Sosyn balam «mende halyqpen birge aıtarymdy aıtaıyn» dep adamdarǵa qosylǵan. Kóligin kóshege – Saına-Tóle bı jaqtaǵy úılerdiń mańyna qaldyrǵan. Jolda kólikterdiń órtenip jatqanyn, áskerı kıimdi ishin syrtyna aýystyryp kıip alǵandardy kóredi, áldebireýlerdiń «ásker halyq jaqqa ótti» dep aıqaılap júrgenin estıdi. Solaı toppen birge qalanyń ortalyǵyna qaraı jyljıdy. Saǵat túski on eki shamasynda Shevchenko kóshesiniń boıynda Nazarbaev pen Abylaıhan kósheleriniń arasynda bireýler ıtti uryp jatqanyn kóredi. It bos júr, aýzynda «namordnıgi» bar. Balam uryp jatqandarǵa jaqyndap, «buda neleriń bar» dep ıtke arasha túspek bolady. Sol kezde «sen nege ıtti qorǵaısyń, znachıt mılısııadansyń» dep balamdy urmaqshy bolyp, eregesip ketken. Aqyrynda balam ıtti alady. Aınala dúrbeleń bolyp jatqanda ıtti kimge bererin bilmeıdi.  Jan-jaǵynda ne polısııa, ne «voennyı» joq. Ondaı kezde ıtti eshkim almaıtyn da edi. О́zi burynǵy «voennyı», Sh.Ýálıhanov atyndaǵy Kadet korpýsyn qyzyl dıplomǵa bitirgen. Qapshaǵaıdaǵy DShB-da «serjant roty» bolǵan. Sodan ıtti qaldyrmaı, jetektep alańǵa barady. Ol jaqta birde bir polısııa men áskerı adam joq ekenin, atys bolyp jatqanyn kórip, munyń beıbit mıtıng emes ekenin túsinedi de 2 myń teńgege taksı ustap, ıtti bagajnıkke salyp, kóligin tastaǵan jerge, artynsha úıge keledi, – deıdi ol.

 

Anar Orazalınova ulynyń qyzmettik ıt ákelgenine o bastan qarsy bolǵanyn jetkizdi. «Qaıdan ǵana ákeldiń, erteń ózińe bále bolyp jabysyp júrmesin» dep azar da bezer boldyq deıdi. Balasy sonda «mama muny tastasam, obal ǵoı. Buda til joq qoı, uryp jatqanda qorǵadym. Bul úshin meni jaýapqa tartpaıdy. Sol jerde kórgen adamdar bar. Itte arnaıy chıp bolady, sonymen ózderi taýyp alady. Ary ketse, túsinikteme jasarmyn» degen.

Anasy sodan beri Ańsaǵan úıinde bolǵanyn, tótenshe jaǵdaı rejımi aıaqtalǵanyn kútip, ıtti jasyrmaı, oǵan uıa jasap, qamqorlyq tanytqanyn jetkizdi.

 

– Balam qanen-qapersiz, oıynda eshteńe joq úıde boldy. 17 qańtar kúni kelindi jumystan alyp ketý úshin nemeremmen qalaǵa ketedi. О́zi joqta 3 adam ıtti izdep kelip, alyp ketipti. Úıde qudaǵıym bolǵan edi, sodan Ańsaǵannyń nomerin alǵan. Sodan saǵat keshki 6-larda balama Áýezov aýdandyq polısııa bóliminen habarlasyp, «brat ıtti alyp kettik, kelip túsinikteme jasyp ketshi» dep shaqyrypty. Ańsaǵan kirem de shyǵam ǵoı dep oılap, kelin men nemeremdi alyp, polısııa bólimshesine barady. Balam bólimshege kirgen boıda qolyn artqa qaıyryp, operler toqpaqtaı jónelgen. Arada bir jarym saǵat ótkende kelinim habarlasyp, bolǵan jaıtty aıtyp tur. Sóıtsek, sol jerdegi tergeýshilerdiń biri Ańsaǵanǵa sen jańa ǵana óz aıaǵyńmen kelip ediń ǵoı, endi nege kisendeýli jatyrsyń depti. «Opoznanıe» jasamaǵan. Ittiń ıesi efreıtor Rústembek Baıqarashev degen Ulttyq ulannyń sarbazy eken. Ol ózin urǵan adamnyń túrin kórmegenin, tek sary «kýrtkasy» bolǵanyn aıtqan. Al balamnyń kýrtkasynyń túsi sur. Ony saraptamaǵa jiberýge de daıynmyn. Men bólimshege kelip, KPP-ǵa jolyqtym. Ol jerde eki adam avtomatmen, bireýi azamattyq kıimde otyrdy. Balamnyń jaǵdaıyn aıtyp edim, azamattyq kıimdegi jigit áı-sháı joq balamdy búlikshi terrorıst deı jóneldi. Alla sonyń aldyna ákelsin. Men balam terrorıst bolsa, avtomattaryńmen meni atyńdar, balamdy terrorıst jasaıyn dep jatsyńdar ma dedim. Qaıta avtomat ustaǵan bireýi shyǵyp, maǵan kire almaıtynymdy aıtty. Bir kezde televıdenıe shaqyrǵanyn, balamdy DVD-ǵa áketedi degendi estidik. Erteńine kelsek jaýap joq, – deıdi Anar Orazalınova.

 

Ertesine kóptegen aqparat quraldary tártipsizdikter kezinde qyzmettik ıt urlanyp, ıtti urlaǵan adam qolǵa túskeni týraly aqparatty taratty.

Al Anar Orazalınova «qolǵa túsirgen túgi de joq, balam polısııaǵa óz aıaǵymen bardy. Ol terrorıst, búlikshi bolsa, nemese soldatty ursa, bólimshege óz aıaǵymen bara ma, jyndy adam da barmaıdy ǵoı. Onyń ústine ol burynǵy voennyı bolǵannan keıin onyń bárin biledi. Qalaı barady» dep ashynady.

Ol ulynyń Áýezov aýdany polısııa bólimine óz aıaǵymen barǵanyn aıǵaqtaıtyn beınebaqylaý kadrlary da joǵalyp kete me dep ýaıymdaıdy.

20 qańtarda memlekettik advokat Ańsaǵan Almuhanov 380-bap boıynsha kúdikke ilingenin, tergep-tekserý úshin sot sanksııasymen 2 aıǵa qamaýǵa alynǵanyn, LA-155/18 mekemesine jetkizilgenin aıtqan.

Anar Orazalınova on kúnnen astam ýaqyt tergeý ızolıatoryndaǵy ulyn kóre almaǵan. «Karantın dep kirgizbedi» degen ol memlekettik advokatqa jalynyp júrip 31 qańtar kúni birinshi ret balasyna kirýge ruhsat alǵanyn aıtady.

– Kirsem, balamnyń bet-aýzy kógergen. Biraq «bári jaqsy, kelmeı-aq qoı, mama, keshirshi» deı beredi. Búgin ekinshi ret kórdim. Eshteńeni moınyna almaǵan. Qansha ursa da moıyndatqyza almaǵan. Ol minezi sondaı adam. 3-synyptan beri voennyı bolam deıtin. Men endi balalarym, nemerelerim voennyı, polısııa bolam dese, bolǵyzdyrmaımyn. Kerek emes, bizde ádildik joq» degen ol balasynyń kináliligin dáleldeıtindeı atalǵan iste «qylmys quramy da, kýá de, týra dálel de joq» dep otyr.

Anar Orazalınova balasynyń ıtke arasha túskenin kórgen adamdar bolsa, olardan kýálik etýdi suraıdy. Alaıda kórgen adamdar «bizdi dep qamap qoıady dep qorqyp kýálik ete almaıdy-aý» dep qınalady.

«Ne bolsa da, aqyryna deıin baramyn, balamdy japqyzyp qoımaımyn» deıdi sherli ana kózinen jasy parlap.

Melis Seıdahmetov

Avtormen onyń Facebook paraqshasy arqyly habarlasýǵa bolady.

Jazylyńyz

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir