Quqyqqorǵaýshy: Azaptaýdy qoǵam bolyp jumylǵanda ǵana toqtata alamyz

Prezıdent Q.Toqaev eldegi halyq narazylyǵynan keıingi tártipsizdikter kezinde jasalǵan túrli zańsyzdyqtarǵa qatysty bas prokýratýraǵa tapsyrma berip, kúdiktilerdiń kinási qandaı dárejede ekenin anyqtaýdy júktegen. Jaýaptylyqty aýyrlatatyn mán-jaı bolmasa, jazany jeńildetý úshin shara qabyldaǵan jón ekenin aıtqan. Arada bir apta ótti. Alaıda jazany jeńildetý bylaı tursyn, tergeý ızolıatorynda kúdiktilerdi azaptaý, alańǵa beıbit shyqqan adamdardan "qylmysker jasaý" áreketteri tyıylar emes.

Tipti máselege álemdik qaýymdastyqtar nazar aýdaryp, búgin Eýro parlament  Qazaqstandaǵy adam quqyǵynyń óreskel buzylyp jatqanyn qatań synǵa alyp, Qazaqstannyń joǵary laýazymdy tulǵalaryna sanksııa salýǵa shaqyrdy.

Narazylyq aksııalaryna qatysqany úshin qamalyp, polısııa qyzmetkerleri tarapynan azaptalyp jatqan adamdar jaıly kúnde túrli medıa jazyp, jýrnalıster, quqyqqorǵaýshylar, belsendiler  áleýmettik jelide dabyl qaǵyp jatyr.

Máselen, quqyqqorǵaýshy Shynqýat Baıjanov Almaty qalasydaǵy 18 tergeý ızolıatorynda bolyp jatqan azaptaý faktileri týraly jazdy.

"Búgin SI-18-ge Qańtardaǵy qandy qyrǵynǵa baılanysty jazyqsyz jalaǵa ushyraǵan eki balaǵa kirip shyqtym. Korıdorda aıaǵy aqsaqtaǵan, baldaqpen júrgen, ishten, ıyqtan, bastan jaralanyp, tańylǵan jastar óz advokattarymen kezdesý úshin kútip turdy.Tipti bireýin nosılkamen alyp keldi. Ishiń qan jylaıdy, jáýdiregen kózderine qarap sharasyzdyqtan ernińdi tisteısiń, al syrttaı "aınalaıyndar shydańdar, eńseleriń túspesin, bári jaqsy bolady"- dep qanattandyrǵan bolasyń. Al meniń qorǵaýymdaǵy eki bala da "aǵa óltirip turyp birneshe kún urdy, qan sıgizdi, istemegendi istedim degizip hattama jasady, qol qoıǵyzdy, mıtıngige shyqqannan basqa jazyǵymyz joq"- dep zar ılep otyr. "Dáleldemesiz sottaı almaıdy, zańsyz toltyrylǵan hattama úkimge negiz bolmaıdy"- dep úmittendirip kettim. Árıne barlyq kúsh jigerimdi olardy aqtaýǵa jumsaımyn, biraq átteń..." deıdi quqyqqorǵaýshy sharasyzdyqtan.

Shynqýat Baıjanov "osyndaı jaǵdaılar týraly únsiz qalýǵa bolmaıdy, qazirgi ýaqytta azaptaý, qýǵyndaý derekterin tek áshkereleý, jarııalaý arqyly toqtata alamyz" deıdi.

Shynqýat Baıjanov qoǵamdyq komıssııa qurý týraly túrli bastamalar kóterilip jatqanyn kórip júrgenin, ondaı komııassııa quramyna zańsyzdyqtardy jaýyp, búrkemeleýge kónbeıtin, ymyraǵa kelmeıtin adal adamdar kirýi kerek degen pikirde.