Almatyda qaza tapqan polıseılerge qatysty aqparat shyqty

Almaty polısııa departamentiniń basshysy Qanat Taımerdenov shtab otyrysynda jappaı tártipsizdikter kezinde qaza bolǵandar men jalpy shyǵyn týraly aldyn ala málimetti jarııalady.

– Almatydaǵy tártipsizdikter kezinde 9 polıseı qaza tapty, bes qyzmetker aýrýhanada jatyr, ekeýiniń jaǵdaıy aýyr. Barlyǵy 1 097 polısııa qyzmetkeri túrli dene jaraqatyn alǵan, – dedi Q. Taımerdenov.

Sonymen qatar, 5 front-ofıs, 19 modýldik bólimshe jáne 13 ekopost órtengen. Almaly polısııa bólimi de qıraǵan. Qalada tek eki ekopost ǵana búlinbegen.

– 165 kólik zaqymdanǵan, onyń 64-in qalpyna keltirý múmkin emes. 7 qarý-jaraq qoımasynan 1 347 qarý urlanǵan. Búginde 127-si tárkilendi, onyń 58-i ańshylyq dúkenderden urlanǵany anyqtaldy, – dep atap ótti departament basshysy. 

Keshe Qanat Taımerdenov Almatyda 149 adam qaza tapqanyn habarlaǵan bolatyn.

Bas prokýratýra qylmystyq qýdalaý qyzmetiniń bastyǵy Serik Shalabaev elde tártipsizdikter kezinde jalpy 4578 adam zardap shekkenin málimdedi. Onyń ishinde 4353-i jaralanǵan, 3393-i quqyq qorǵaý organdarynyń qyzmetkerleri ekeni anyqtalǵan. Jalpy 225 adam qaıtys bolǵan.

Eske sala keteıik, 2 qańtarda Mańǵystaý  oblysynyń turǵyndary suıytylǵan gazdyń qymbattaýyna baılanysty mıtıngke shyǵyp, uzamaı eldiń ózge óńirlerinde de halyq narazylyǵy ótken. Beıbit mıtıng túrinde bastalǵan narazylyq sharalarynyń sońy jappaı tártipsizdikke ulasqan. Sonyń saldarynan Almaty, Taldyqorǵan qalalary qatty zardap shekti. Tártipsizdikter kezinde ákimdik ǵımaraty órtendi, prezıdent rezıdensııasy basyp alyndy. Dúkender, saýda ortalyqtary, bank keńseleri men bankomattar tonaldy.